India Portal

Media in Mizoram
English
Mizo
Achieve
Current Photo
Archives
Contact Information
About us
Accredited Journalist
 
 
 

PRIME MINISTER SHRI NARENDRA MODI A'N RED FORT KULH ATANGA INDEPENDENCE DAY VAWI 68 NA-A RAM MIPUITE HNENA THUCHAH A SAWI

Dated Aizawl, the 15th August 2014

Khua leh tui duhtakte u,
 

Vawiinah hian India ram chhung leh pawn lama awm khua leh tuiten Independence day kan lawm a, He ni bik ropui takah hian

India chhiahhlawh pawimawh ber, Prime Servant chuan ram mipui zawng zawngte chibai ka buk a che u.

Vawiinah hian Prime Minister anga in zinga lo tel nilovin, chhiahhlawh pawimawh ber, Prime Servant anga lo ding ka ni. Zalenna nei tur hian kum tam tak kan bei a, chhuan tam takin an nun an hlan a, mi tam takin an that lai hun leh an nun an hlan a, damchhunga tan in-a tang te an awm a, vawiinah hian anmahni zahna chibai ka buk a, ram tana nun hlantute zawng zawng pawh thinglung takin ka sun a ni.

Independence day lo thlengah hian India mipui vaibelchhe tel te chibai ka buk a, he ni hi kan ram tana kan inhlan tharna ni tur a ni a, mirethei, chhumchhia leh rahbeha awm mekte, hnam hnufual leh neksawra awm mekte tana hmathar lakna ni tur a ni.
Ram mipui duhtakte u, he ni ropui hi kan ram kalphung siamthatna ni tur a ni a, he ni a lo thlen hian kan kalphungte pawh hmasawn zawngin kan her danglam tur a ni ang. Kan ram tan inhlan thar ila, kan thil tih engkimah kan ram tana tha ber tur thlir ila, chuti chuan he ni kan hman hi kan ramin hmasawnna rahbi thar kaina atan a hmang thei dawn a ni.

Ram mipui duhtakte u, He ram hi Politics lama hruaitute emaw, Ram awptute emaw, Sorkar emaw din nilovin, loneitute, kuthnathawktute, Nu te leh kan laizawnte, kan thalaite din a ni. Kan ramin tun dinhmun a thlen theih chhan hi chhuan tam tak chhunga kan puithiam leh sakhawmi te, zirtirtute, scientist te leh khawtlang rawngbawl hna thawktute thawh rah a ni a. Heng mi ropui leh chhuan hrang hrang lo kal tawha kan ram tana hna lo thawktute hian chawimawi an phu a ni. Kan ram danpui mawina tizualtu chu vawiinah hian thingtlang naupangte pawhin he kulh sen, Red Ford ah hian kan hnam puanzar chibai bukna remchang an nei thei a, hei hi kan rama mipui rorelna Democracy ti chaktu a ni a, he thil hi kan ram danpui Constitution duangtu, mi hrang rualte min pek a ni a, kan ram danpui min duansaktute pawh vawiinah hian zahna chibai ka buk a ni.

Unaute u, Independence hnua tun dinhmun kan thlen theihna chhan hi Prime Minister lo ni tawh zawng zawng thawhrimna vangte, Sorkar lo ding tawhte leh State Sorkarte thawrh rah a ni. Sorkar lo kal tawh zawng zawngte leh Prime Minister lo ni tawh zawng zawngte zahna chibai ka buk rualin an chungah lawmthu ka sawi bawk a, kan ram ropuina tura an inpekna leh an thawhrimna te chuan tun hi min thlen a ni.

He ram hi hnam nunze nghet tak lunghphum atanga lo ding chhuak a ni a. Chu lungphum nghet tak, Vedic hunlaia kan innghahna leh kan thupui, kan hnathawh kalphung zawng zawng innghahna, kan zirchhuah leh kan rilru-a intuh tlat chu “Sangachchhdhvam Samvadadhvam sam wo manansi jaanataam.” tih, 'Hmalam panin kan vaiin ka pen a, kan ngaihtuahna kan seng tlang a, harsatna kan su tlang a, kan zavaia tangrualin he ram hi hmasawnna lamtluang kan zawh tir a ni tih hi'. He kan thupui behchhan hian kan ram mipui vaibelchhe 125 zet hian kan ram hi hmasawnna lamtluang kan zawh tir mek a ni. Nimin maiah khan Sorkar thar hnuaia Parliament Session hmasa ber chu zawhfel a ni a, Session zawhfel tak khan kan rilru puthmang leh thil kalpui kan tum dante chiang takin a pholang tih chhuang takin ka sawi duh a ni. Tam zawk nihna avanga thil kalpui kan tum lo a, tam zawk kan nihna chhunga thil tih kan tum hek lo. Inlungrualna tha tak nena hmalam pan kan duh a, 'Sangachhadhwam' tih ang khan. ram mipui zawng zawngin Parliament Session kha an thlir a, Eptu pawl zawng zawngte nen thukhat vuain, hlawhtlinna ropui tak kan hmu a, kha kha Prime Minister thawh rah a ni bik lo a, Sorkarna siamtute thawh rah a ni hek lo, eptu pawl zawng zawngte nena kan thawh rah a ni. Red Fort kulh atang hian chhuang takin, Parliament Member zawng zawngte chibai ka buk nawn a, Political party zawng zawngte pawh min thlawpna avangin ka lawm a, kan ram hmasawnna turin thutlukna pawimawh tak anmahni zarah kan siam thei a ni.

Unaute u, Delhi hi ka piah leh murna a ni lo a, He hmuna inrelbawlna kalpui dan leh inawpna kalphung ka hre hek lo. He hmun changkang tak atang hian hla takah ka awm a, mahse thla 2 liam ta chhung khan, a chhung atanga ka thlirin, mak tihna in min hual a, Politics thil nilovin, ram inrelbawlna thil a nih vangin, ka thil hmuh dan hi Poilitics thil taka chhut zui a remchang lo ang. Ka sawi tawh angin, Prime Minister lo ni tawh zawng zawngte leh Sorkar lo ding tawhte, tun dinhmun min thlentute ka zah em em a. Mahse thil dang sawi ka la duh a ni. Delhi-a ka lo kal hian mak tih deuh ka neih chu Sorkar pakhat hnuaiah Sorkar dang engemawzat a awm ni hian ka hmu a, chungte chuan mahnia thuneihna bial nei theuhin, an karah in nghirnghona leh in lungruallohna a awm tih a lang a, Department pakhat chuan Department dang lakah lungawilo in an lungawilohna chu Supreme Court thleng an kalpui hial a. Hetianga inlungrual lohna hnuaiah hian kan ram hi engtinnge hmasawnna kawngah kan hruai theih ang. Hei vang hian chung indaidanna bangte chhut chhiat hna chu ka thawk nghal a, thil chi hrang hrang remkhawm satliah hmanga din nilo, Sorkar hlawm khat, inlungrual leh tum thuhmun neia hnathawk din tumin hma ka la a ni. Kan ram hi hawi lam inanga hmasawnna kawng zawh tir turin intiam ila, chumi ti thei tur chuan theihna kan nei sa a ni. Ni reilote liamta ah khan India

National Newspaper leh TV Media ah te 'Pu Modi-a sorkar a lo ding a, Officer ten a hunah office an thleng a, Office hrang hrangte a hunah a inhawng a, mipuite pawh a hunah an thleng ta' tih hi langsar takin an ziakin an puang chuai chuai a. Faina chungchang ngaihsak a nih tak thu te hian min tih lawm a hnekin min ti na a, a chhan chu vawiinah hian mipui hmaah ka sawi duh, Engah nge Officer a huna Office kalte chu news a tlin tak, hei hian kan lo tlak hniam nasat tawh zia a ti chiang tlat a ni. Unaute u, India mipui maktuaduai tel tam takte beiseina ti hlawhtling tur hian a van tla nghah chi a ni lo a, Sorkar inrelbawlna inkhaidiat zawng zawngte kan tih chak a ngai a, ngaithuahna harhvang, hnathawk thei ni tura siam turin kan bei mek a ni.
Ram mipui duhtakte u, Delhi ka lo luhna hi hun rei a la ni lo a, mahse Sorkar hnathawkte hi an tha em em vek a, Peon atanga Cabinet Secretary thlengin an tha em em vek a ni. An vaiin thil tihtheihna an nei vek a, tawn hriat an nei vek bawk a, chu an thil tih theihna chu chawh thawh ka duh a, chung an thil tih theihna te chu hlawm khawmin, kan ram hmasawnna tura hman ka duh a, ka hmang dawn bawk a ni. Ram mipui zawng zawngte hei hi ka tiam che u a, he thil hi May ni 16 ah kha chuan ka sawi ngam lo a, vawiin August ni 15 ah hi chuan a theih tih ka hmuchhuak tawh a. Kan ti ngei dawn a ni.

Unaute u, vawiin hi zalenna min petu kan miropuite duhthusam ram siam tura ngaihtuahna ril tak kan sen hun a ni dawn lawm ni, mize bik nei ram kan ni lawm ni?

Unaute u, tuemaw talin min hrilh thei em, ni tla vanvuaia hna a thawh hnu-a a hnathawh chuan kan rama miretheite tan hmasawnna engemaw tal a thlen em tih tlai lama ngaihtuah let thin engzatnge kan zingah awm le? A thil tih chu kan ram himna tur leh ram tana thil tha ber a ni em tih ngaihtuah let thin engzatnge awm? Vanduaithlak takin tunlai hunah hian tuemaw hnathawk tura I tih chuan zawhna I dawn hmasak ber chu 'chu chuan enge ka tan hlawkna a thlen dawn?' tih a ni ta zel mai. A tana hlawkna awm lo tur a nih chuan 'Enge ka lo buai ve a tulna?' a ti thuai ang. Thil zawng zawng hi mahni tan vek a ni lo a, thil engemawzat hi ram tana tih ngai chi a ni a, kan ngaihtuahna thlakin 'Ram tana ding tur ka ni a, he thilah hi chuan hma ka hruai ang' tih hi kan ngaihtuah dan tur a ni zawk.

Unaute u, Pawngsual a lo thlen hian zak takin kan lu kan kun a, mipui nawlpui pawhin ngaihdan hrang hrang an sawi cham chi a, mahse unaute u, vawiinah hian Nu leh pa te zawhna kan zawt duh a ni. Nu leh pa zawng zawngte hian fanu kum 10 leh 12 mi in neih chuan engtiklai pawhin in ngaihven a, khawi ilo kal dawn se, khawnge a kal dawn, engtikah nge a lo let dawn tih te zawtin an kir ruala in report nghal turin in ti thin a ni. Hmeichhe fa chuan zawhna 100 chuang a dawng thin a, mahse nu leh pa te hian an fapa te erawh khawngee an kal dawn tihte, engvanga kalchhuak tur nge an nih tih te, an thian kawmte an zawt ve ngai mang tlat lo. Pawngsualtute hi tute emaw fapa chu an ni tlat zel si. Nu leh pa zawng zawngte hian kan fapa te hi heng zawhna te hi kan zawt taima ve tur a ni.

Unau duhtakte u, Dan chuan a kawng a zawh dawn a, thununna pawh khauh taka lekkhawh a ni ang, mahse Society a cheng kan nih ve avangte, Nu leh pa kan nih vangte hian mawhphurhna kan nei a ni. Tuemaw in Silai leka pawisawilote kaphlumtu chu Maoist an ni e, mifirfiak an ni e tih an sawi a, mahse chung mite pawh chu tute emaw fapa an ni vek a, Nu leh pa te hian an fapa te chu engvanga kawng diklo thlang nge an nih an zawt ngai em? Nu leh pa te hian heng mawhphurhna zawng zawng hi kan kova kan nghah thar leh a ngai a, Pawisawilo te thah hi amah emaw, a chhungte emaw ram tan emaw-a rawngbawlna a ni thei ngai dawn lo tih hi kan fate kan hrilh nawn fo a ngai a ni. Thalai, kawng diklo zawha tharum thawh duhna thinlung pu mekte pawh anmahni dinchhuaktu chu kan ram ropui India hi a ni tih hre thar turin ka ngen a, Tupawh ni ula, Silai aiah leilehna hal pu-a, kan ram mawina leh he khawvel mawina chen zawk turin ka ngen che u a ni. Kan ramah hian eng chen nge thisen kan luan tir dawn, pawisawi lo nunna eng chen nge kan laksak dawn, anih heng thil avang hian enge hlawkna kan tel le, Tharum thawha chetna lamtluang hian kan tan engmah hlawkna min thlen lo.

Unaute u, hmanni mai khan Nepal ka tlawh a, chutah chuan Roreltu Ashoka'n indo mi anihna atanga Buddha hniakhnung zuia tharum thawhna a hnualsuat tak dan te, Nepal ah pawh thalai rualten tharum thawhna chetna bansan-a Constitution an nghah mek thu te ka sawi a, Nepal hian hetianga tharum thawhna atanga remna lamtluang an zawh dan hi khawvel hriata an puan chuan khawvel puma thalai, kawng dik lo zawh mekte zirtirna dik petu a ni thei dawn tih ka sawi a ni. Unaute u, Buddha lenna ram, Nepal hian khawvel hriatah chanchin duhawm an puan chhuah theih chuan engahnge India pawhin a theih loh bik ang? Tun hi tharum thawhna hnualsuata inunauna tha nei tura kan inhlan thar hun a ni.

Unaute u, chhan engemaw avangin sakhaw thila innghirnghona chu kum tam tak kan lo nei tawh a, hei hian ram a thendarh a, Independence hnu ah pawh chi inthliarna leh sakhaw inthliarna chuan min la ti buai chhunzawm ta zel a, heng thilte hian eng chen nge min la tihbuai dawn, tunge a hlawkna tel reng reng, kan in nghirnghona hi a tawk tawh a, mi tam tak thah an ni tawh. Thiante u, han thlir kir teh u, tumah in an hlawkpui reng reng lo. hetianga chi inthliarna te, sakhaw inthliarna te, mahni awmna bial bil rilru te, inenhranna chi hrang hrangte hi kan ram hmasawnna daltu lian tak a ni. Khawnge heng thil min tibuaitute hi kum 10 chhung atan I han dahbo chhin teh ang, tanrualna, induhsaktawnna leh inunauna tha tak hnuaiah chuan engang taka thil ti thei nge kan nih a lo lang chhuak dawn a ni.

Ram mipu duhtakte u, min ring ula, ka tiam bawk a che u, sual kan lo tih tawh zawng zawngte chu theihnghilh ila, chu kawng chu hawisan ila, induhsaktawnna leh inunauna lam tluang zawh ila, kan ram hi hmasawnna kawngah I pen tir ang u, hei hi kan ti thei a ni.

Science thiamna hmasawnna nen, unaute u, kan thinlungah hian hmasawnna rilru kan pu tlang a, mahse eng kan ti nge, hmeichhe fa piang zat hi mipa sangkhat zelah 930 chauh a la ni tih kan ngaihtuah ngai em, tunge he inbuk tawk lohna hi thlen tir le, Pathian chu a ni lo tih chiang takin ka sawi duh. Doctor te pawh an ipte tihpuarna tur maia hmeichhe fa, nu pum chhunga awm tihlum lo turin ka ngen a, Nu te leh unaunu te pawh mipa fa duh vang ringawta hmeichhe fa ti hlum mai lo turin thu ka rawn a ni. A chang chuan Nu emaw pa emaw hian kum upat hnua anmahni tanpuitu tur thlirin mipa fa an duh thin. Kei hi mipui vantlang rawngbawl hna thawktu ka ni a, mipa fa hlir panga nei, chhungkua te pawh ka lo hre tawh a, an fa te chuan Bungalows an luah a, Car man to tak tak engemawzat an nei a, mahse nu leh pa te erawh tar chawmna hmun, Vriddhashrams a awm ta te pawh ka lo hre tawh, chutiang chhungkua chu ka mit ngeiin ka hmu a, chhungkaw thenkhat fanu mal chauh nei pawh ka hria, chu fanu mal chuan a nu leh pa tan a nun hlanin, pasal nei lovin a nu leh pa tan a nun pum a hlan a ni. He thil hmeichhe fa duh loh vanga nau tihtlak thleng thin lak atan kan zalen a ngai a, hei hi Independence day kan lawm ruala thuchah pawimawh tak a ni.

Commonwealth Games chu tunhnai khan zawhfel a ni a. India Infiammi ten kan ram an ti mawi a, infiammi 64 zetin hnehna changin medal 64 zet an hlawhchhuak a. An zinga 29 te chu hmeichhia an ni, heng mite hi chhuang ila, anmahni I lawm ang u. Hmeichhiate pawhin kan ram tiropuitu an ni a, hei hi hriatpui ila, I chawimawi ang u. Heti hian kan khawtlang nuna thil thalo tak lo inphum ru hi kan ti bo thei dawn a ni. Unaute u, he kawng dik hi zawh ila, hmasawnna hi kan ram kan hruaina tur kawng awmchhun a ni. Sorkar tha siam hi kawng awm chhun a ni a, kawng pahnih kan ram kan hruaina tur chu hmasawnna leh Sorkar tha siam hi a ni. Sorkar tha ka sawi hian enge a awmzia min zawt a ni mai thei, Mi tuemaw enge a thawh tih ka zawh chuan, Mimal hnuaia hnathawk chuan chumi kha mi hna ka thawk a ti thin a, Sorkar hnuaia thawk erawhchuan Service mi ka ni a ti thin. Sorkar hnuaia hnathawk zawng zawngte hei hi ka zawt a ni, Service tih hi a nih tur ang a ni phak em, Hna thawk lovin Service ah an lut tihna mai em ni, He thil hi kan siamthat a ngai a, chumi kawngah chuan kan ram hi kan hruai ang a, hmalam panin kan kal dawn a ni.

Unaute u, Khua leh tui zawng zawngte hian kan ram tan hna kan thawk tur a ni dawn lawm ni, han ngaihtuah chhin teh, kan ram mipui vaibelchhe 125 zet te hian pen khat cheuh hmalamah kan pen chuan kan ram chuan pen vaibelchhe 125 a pen dawn tihna a ni. Mipui rorelna Democracy ah hian ram hruaitu tur thlan ngawt hi a tawpna a ni lo a, a awmzia chu mipui vaibelchhe 125 zet te nena thawkho-a ram mipuite beiseina ti hlawhtling tura a bul tanna a ni. Hei hi Mipui rorelna Democracy awmzia dik tak zawk chu a ni. Mipuite te nen kan thawhho a ngai a, Pulic Private Partnership uar zawka kan kalpui a ngai a, mikpui tam zawkte telve theihna tur zawngin kan kal tur a ni. Mahse hei hi min chhang teh u, kan loneitute hian engvangin nge mahni an intihhlum thin? Loneitu chuan mi hausa hnen atangin sum a puk a, a rul leh thei si lo a, a fanu pasal neihna senso atan sum a puk a, a rul leh thei si lo a, a damchhung nun harsa leh hrehawm taka hman ai chuan mahni a intihlum ta mai thin a ni lawm ni. Heng loneitu miretheite hi tunge chhanchhuak ta ang le.

Unaute u, Zalenna ni lawmna-a ka lo kal hian thutiam nen ka rawn kal a, chu chu 'Pradhanmantri Jan Dhan Yojana' tih a ni ang. He Youjana hmang hian kan rama mirethei ber te pawh an vaiin Bank Account nen thlun zawm ka tum a ni. Mi maktaduai tel tam tak mobile phone nei si, Bank Account nei silo an awm a, hei hi kan thlak danglam a ngai a ni. Kan ram hausakina hi miretheite hamthatna tura kan hman a ngai a, chu inthlakthlengna chu tun atang hian a thleng nghal dawn a ni. 'Pradhanmantri Jan Dhan Yojana' hian miretheite tan hian Debit Card a keng ang a, Insuarance cheng nuai 1 a keng tel bawk ang. Tichhuan, chung miretheite chuan harsatna eng pawh lo tawk se, an hminga Insuarance cheng nuai 1 dah chu an hmang tangkai thei dawn a ni.

Unaute u, Kan ram hi thalaite khawvel a ni a, kan ram mipui zaa 65 zet te hi kum 35 chin hnuai lam an ni. kan ram hi khawvela thalaite tamna ber ram a ni. Hemi atanga hamthatna chawk chhuah chungchang hi kan ngaihtuah tawh ngai em? Tunlai khawvel hian thiamna nei hnathawktu a mamawh tak zet a, India pawhin thiamna nei hnathawktu a mamawh a ni. Driver thiam tak te, tui pipe ilo enkawl thiam plumber te, eirawngbawl thiam tak te kan mamawh changin chutiang mihring chu hmuh tur an awm lo thin. Thalai hnathawh tur nei lo kan ngah a, mahse kan mamawh ang thiamna nei an awm silo thin a ni. kan ram hi hmasawnna lamtluanga hruai turin chhawr tlak thiamna nei tura inzirtirna Skill Developement lam kan uar a ngai a, Thiamna nei India, Skilled India tih hi kan thupui a nih a ngai. Maktaduai tel thalai rualten chhawr tlak thiamna nei turin an zir suau suau ang a, chu zirna chu kalphung thar mumal tak hnuaiah ramchhungah felfai taka zarpharh a ni ang. Chung hmun atang chuan India hi ram changkanga hlangkai turin thiam thil an zirchhuak ang a, Ram pawn lama an chhuah pawhin an thiamna chu fak tlak a ni ang a, tichhuan hmasawnna chi hnih kan nei dawn a ni. Thalai midangte tana eizawnna siamsak thei tur chi, harsatna in a phuar beh si te pawh an harsatna sutkian sak ka tum dawn a, chung mite chuan khawvel ram dang lakah pawh inchhuang taka an thiamna an phochhuah theih dan tur kan dap ang. Chung mite tan chuan an theihna leh thiamna an chher hriamna tur ngaihtuah sak ka duh a, unaute u, thiamna tih pun leh chher hriam hi ka dah sang a, hlawhtlinpui ngei ka duh a ni.

Unaute u, Khawvel hi a inthlak danglam tawh a, Ram mipui duhtakte u, Khawvel hi a inthlak thleng mek a, India hi kilkhata thu in a inthiar fihlim thei lo, Khawvel sum leh pai dinhmun a inthlak a, hei vang hian chumi mil a kan chet a ngai a ni. Sorkar chuan tunhnaiah thutlukna pawimawh engemawzat a siam a, Budget ah te pawh thil thar puan a ni a, Khawvel leh khawvel ram hrang hranga cheng India mi te pawh he thu pu darh tur hian ka duh a, thalaite tana hnathawh tur tam zawk siamsak turin thil siamchhuahna lam kan tih hmasawn a ngai a ni. Thalaite thiamna leh theihna kan hman tangkai duh chuan thil siamchhuahna kan tih hmasawn a tul a, kan thil siamchhuah leh kan lak luhte inmil tawka kan kalpui duh chuan thil siamna lam kan tih hmasawn a ngai bawk a, Kan ram Hindustan hian a theih tawp a chhuah rualin, khawvel ram thil ti theite pawh ka sawm a ni. Chuvangin khawvel ram dangte pawh he Red Ford kulh atang hian ka sawm e, 'Lo kal ula, India hi rawn siam teh u, Lo kal ula, India ah hian thil siamna rawn din rawh u, khawvel ram khawiah pawh hralh ula, mahse, India ah ngei rawn siam teh u, Hnathawk thei mithiam kan nei a, talent kan nei a, mahni inthunun thei mihring leh tumna tak tak rilru pu kan ngah a ni'. Kan rama lo lut turin khawvel ramdangte tan boruak tha kan siam a, Electric lam kaihhnawih bungraw chi hrang hrang atanga lirthei lam te, thlai lam chi sawngbawl kawngah te, Paper leh plastic a ni emaw Satellite leh tuihnuai lawng lam thlengin, lo kal ula, India hi rawn siam teh u, kan ram hian thil a ti thei a, ka sawm che u a ni.

Unaute u, kan rama thalaite pawh hei hi ka chah duh, a bikin thil siamchhuahna tenau deuha inhmang mek te, Technical lam zirna-a inhmang mek te, India rama lo lut tura khawvel ram dangte ka sawm rualin, India rama siam, 'Made in India' tih hi kan thupui tur a ni. Kan ram siamtha tur hian Bhagat Singh anga khaihlum nih kher a ngai em, Unaute u, Lal Bahadur Shastri khan hei hi thupuiah a nei a, 'Jai Jawan, Jai Kisan' Sipai chuan ramri ah ram venhim hna thawkin a nun hlan huamin hna a thawk a, chutiang bawkchuan loneitute pawhin kan ram buhzem an chhungkhat thung a, buhzem chhun khah hi loneitute hnathawh ropui ber a ni. Hei vang hi a lawm Lal Bahadur Shashtri khan he au hla, 'Jai Jawan, Jai Kisan' tih hi a lo thlan ni.

Unaute u, thalaite hnenah he chona hi ka siam duh, engvangin nge thil te tham te te thlenga ram dang atanga kan lakluh a ngaih, kan thalaite hei hi in chingfel thei a ni. thalaite hian zirbingna neiin, eng thilte nge ram dang atanga kan lakluh zirchiang sela, a te emaw a lian emaw, siamchhuak ve turin tan la se, tunhnuah kan chawk luh a tul tawh lohna turin. Chumi piahah chuan chung thilte ram danga thawn chhuak ve zawk tura kan in san mar a ngai a, kan thalai maktaduai tel zette hian chutianga an tih chuan India hi thil thawnchhuaktu ram ropui a ni thei a ni. Chuvangin thalaite hei hi ka chah duh, a bikin sumdawnna tenau deuha inhmang mekte, thil chi hnih chiah an thlauh thlak miah loh tur chu 'a that lohna pakhat te mah awm lo' leh 'Nghawng dang thalo nei miah lo' tih hi. A that lohna engemaw hmuh tur awm miah lo in thil kan siam ang a, a leituten an thleng let leh ngai miah lo a ni tur a ni. Kan thil siamchhuahte chu thil dang nghawng thalo nei thei a ni tur a ni hek lo, Environment ti chhe thei a nih a rem lo a, hetiang taka kan thil siamchhuahte kan uluk chuan, kan tum ram hi kan thleng ngei ang tih ka chiang a ni.

Unaute u, Kan thalaite hian khawvel mit hmuhah India hi an chawisang a, Tunhma deuh khan khawvelin engtinnge min hriat? kum 25-30 mai liam ta thleng khan, khawvel ram hrang hranga mipuite chuan India chu Rul hmanga intihlim thin, Dawi thil lam uar tak niin an hre fo thin. Kan ram nihna dik tak hian khawvel ram dang a la thleng ngai lo a, kum 20, 22, 23 bawr chho thalai rualte chuan khawvel ram dang thalaiten Computer an thiam bik zia an la hre reng a, mahse IT lama kan mithiam thalai rualte chuan India chu dinhmun tharah an hlangkai ta. Kan ram hian chutiang taka chakna a neih si chuan enge kan ngaihtuah ngai ni ta, 'Digital India' tih hi kan inhlankaina tur a ni. Digital India tih ka sawi hian mi changkang chinte chhawr tangkai tur chauh ka sawi lo a, miretheite chhawr tangkai tur zawk a ni. Thingtlang naupang pawhin zirna changkang tak a dawng thei tur chu han ngaihtuah teh, kan rama thingtlang khua zawng zawng hi Broadband-a thlun zawm vek a nih chuan thingtlang khaw kilkhawr ber berah pawh zirna changkang kan thlen thei dawn a ni. Doctor indaihlohna ah te Telemedicine Service kan dah theih chuan chung thingtlanga miretheite hriselna dinhmun enkawlna kawngah chuan rahbi thar kan kai dawn tihna a ni. Kan khua leh tui te hian mobile phone an nei fur a, mahse, Mobile phone hmang tangkaia sawrkar inrelbawlna kalpui dan lamah ngaihtuahna kan seng tawh em, mirethei tu pawhin a mobile phone kaltlanga Bank Account a enkawl theih dan tur kan ngaihtuah a ngai a, a mobile phone hmanga Sorkar atanga a thil mamawhte a thlen zung zung theih a ngai a, thil dilna application form chi hrang hrang a thehluh theih dan turte, khawi hmun atanga pawha a sumdawnna a enkawl theih dan turte kan ruahman a ngai a, heng zawng zawng ti tur hian 'Digital India' lamtluang hi kan zawh dawn a ni. Vawiinah hian electronics bungrua tam tham tak kan chawlut mek a, thiante u, mak in tih ve tho ka ring, Television, Mobile Phones, I pads leh electronic bungraw dang tam tak hi ram dang atanga kan chawkluh vek a ni. Tuialhthei leh a kaihhnawihte chawk luh hi chu loh theih loh thil a ni a, Oil, Deisel, leh Petrol te kan chawk luh dawt chiaha kan chawk luh tam ber chu Electronics bungrua te hi a ni. Digital India tipuitling tura Electronics bungrua tam tak keimahni ngeiin kan siamchhuah theiha, kan intodelh theih chuan kan ram sum bawm tan a va hlawk dawn em.. Chuvangin e-Governance hi chumi atana kan bul tanna tur a ni a, Rail kawng hian kan ram a thlunzawm a ni tih kan sawi thin ang khan IT hian kan ram mipui zawng zawngte min thlunzawm thei a, chu Digital India hmang chuan kan ram mipui zawng zawngte hian tanrualna tha kan nei thei dawn a ni.

Unaute u, heti zawnga kan kal theih phawt chuan 'Digital India' hian khawvelah min dinchhuah tir ang a, kan thalaite hian theihna an nei a, an tana hun remchang a ni ngei ang.

Unaute u, Tourism lam tihhmasawn hi kan duh, Tourism hian mirethei bak bek ber te thlengin eizawnna a siamsak a, Khawlaia eitur zuartute, Auto Rickshow khalhtu pawhin hlawkna a tel a, thingpui sem thlengin an hlawkpui a, thingpui sem han tih chuan kei ngei pawh hian hnai riua inhriatna ka nei nghe nghe. Tourism hian mirethei ber thlengin eizawnna a siam a ni. Mahse Tourism ti hmasawn tura kan harsatna lian ber chu bawlhlawh kan ngah lutuk hi a ni. Independence hnu kum tam tak liam tawh hnu, kum zabi 21 na bul kan tan atanga kum 10 liam leh tawh hnuah pawh hian hetianga bawlhhlawh zinga la chen reng hi kan duh em ni? Sorkarna ka dinfel hnua ka hnathawh hmasa ber chu faina kawnga beihpui thlak a ni. Mipuite pawhin chutiang thil te Prime Minister hna tur em ni dawn tiin mak an ti a, mahse ka tan chuan hna pawimawh tak a ni tlat. Faina kawnga hmalakna hi hna pawimawh tak a ni a, kan ram hi a fai thei ang em? mipui vaibelchhe 125 te hian ti bawlhhlawh lo tura kan intiam theih phawt chuan khawvela eng thil tih theihna mah hian kan khawpui te, kan thingtlang khuate hi min tih bawlhhlawh sak thei hauh lo ang, hei hi kan tiam thei em.

Unaute u, Kum 2019 ah chuan Mahatma Gandhi piancham kum 150 na a lo ni tawh ang a, Mahatma Gandhi piancham hi engtiangin nge kan lawm dawn, Mahatma Gandhi, Zalenna min pe tu, khawvel ram dang mit hmuha kan ram ropui taka siamtu hi enge kan pek ve dawn? unaute u, Mahatma Gandhi khan faina leh thianghlimna hi a thinlung takin a vei a ni. Kan khua, kan khawpui, kan school, Temple leh Damdawiin ah te bawlhhlawh engmah hnutchhiah lo turin intiam ila, kum 2019-a Mahatma Gandhi piancham kum 150 na kan lawm hunah chuan hei hi kan tihlawhtling tur a ni a, Sorkar chauh nilovin, mipuite hmalakna a pawimawh a, kan vaia kan tih hlawhtlin a ngai a ni.

Unaute u, kum zabi 21 na kan hmang mek tawh a, kan nu leh kan farnu te khawlaia an inthiar lai hmuh a la ngai hian a ti hrehawm ve che u em? hmeichhiate zahawmna vawnhim hi kan vaia mawhphurhna a no lovem ni? mirethei zawk, nu leh hmeichhiate chuan khaw thim an nghah a ngai a, khua a thim fel phawt loh chuan an inthiar ngam lo, kan taksa-a hrehawm an tawrh nasat dan tur kan ngaihtuahpui em? natna chi hrang hrang an kai theihna remchang a tam zia kan ngaihtuahpui em? Kan nu te leh kan farnu te tan inthiarna tha kan ngaihtuahsak thei mai lovem ni? Unaute u, mi tute emaw chuan August ni 15 hi thu ropui tak sawina ni turah an ngai a ni mai thei e, Unaute u, thu ropui tak tak sawi te, hmalakna thar tur thu puan ropui tak tak siam te hian tangkaina lai a nei na a, mahse tute emaw beiseina siamsak a, chu an beiseina chu tihhlawhtlin a nih leh si loh chuan mipui nawlpuite beidawnna khurah a hnuklut thin. Chuvang tak chuan kan hmuh phak, kan tih hlawhtlin theih turte hi kan vei zawk a ni. Unaute u, Prime Minister meuhin Red Ford kulh atanga thianghlimna chungchang leh inthiarna chungchang a sawi ta chu mak in ti a ni mai thei, ka thusawi an sawisel zui dan tur leh mite thinlunga a thawh dan tur pawh ka hmu lawk a ni. Mahse hei hi ka thinlung taka ka intiamna a ni miau a, mirethei chhungkua atanga lo chawr chhuak ka ni a, retheihna hi ka lo paltlang tawh a, retheite hian zah an kaina turin thianghlimna-a bul an tan a ngai a ni. Chuvang tak chuan kumin October ni 2 atanga tan turin Thianghlimna beihpui thlakna, Clean India Campaign bul tan ka tum a, kum 4 chhunga hmalakna tur a ni ang. vawiin atang hian bul tan nghal ka duh a, a bul tan nan chuan School zawng zawngin mipa leh hmeichhia inthiarna a hrangin an nei vek tur a ni a, heti chauh hian kan fanu ten kum laklawhah School an ban a ngai tawh dawn lo a ni. Parliament member te pawh MPLAD an neih te School hrang hranga inthiarna hmun siamna atana hmang turin ka chah a, Sorkar pawhin budget a neih te, School-a inthiarna tha siamna turin a hmang ang a, Corporate Sector te pawh vantlang rawngbawlna tura sum an dah, Corporate Social Responsibility hnuaiah School hrang hrang inthiarna hmun siamsak turin ka chah bawk a ni. Hei hi State Sorkar puina nen kum khat chhunga tih hlawhtlin tur a ni dawn a, nakum August ni 15 a lo thlen leh chuan ram puma School zawng zawngah mipa leh hmeichhe inthiarna tha tak, a hrangin a awm vek tawh tih chhuang takin kan puang thei tawh tur a ni.


Unaute u, tumna kan neih chuan kan hlawhtling thei a ni. Vawiinah hian thil pakhat chiang taka sawi duh ka la nei a, chu chu ram tana thil pawimawh tak, sawiho ngai tak thil a ni. Parliament member te hian tih chu duh mahse, tih theihna remchang an nei ngai lo a, An ngaihdan an sawi thei a, Sorkarah pawh an thlen thei reng a, dodalna an lantir thei a, ngenna an thlen thei bawk a, mahse anmahni tana thil tih theihna remchang an nei ngai lo. Vawiinah hian ngaihtuahna thar nen in hmaah ka lo ding a, Prime Minister hming hian Scheme tam tak kan ramah kan kalpui mek a, hruaiu ropuite hming chawia Scheme kalpui mek tam tak a awm a, mahse vawiinah hian kan MP te hming ngeia kalpui tur Scheme pakhat puan ka duh., 'Sansad Aadarh Gram Yojana' tih hi, ruahmanna kimchang chu kan la siam zui ang. Kan MP te hi an bial chhunga khaw engemaw ber mihring sang 3 atanga sang 5 inkar chenna khua thlangchhuak a, chu khua-a mipuite hriselna dinhmun, zirna lama an dinhmun, faina kawnga an dinhmun leh thil danga an dinhmunte mila cheibawl turin ka duh a, kum 2016 ah chuan model Village ah an siam tawh tur a ni. Hei hi kan thi thei lovang maw, kan thi thei dawn lawm ni, kan ram hi kan siam dawn a nih chuan, thingtlang atanga bul kan tan a ngai a ni. Model Village chu I siam ang aw, kum 2016 target atana kan hman chhan hi scheme thar a nih vang a ni a, 2016 hnuah chuan khaw dang pahnih thlanchhuah leh tur a ni dawn a, kum 2019 Inthlanpui kan hmachhawn leh hunah leh 2019 a lo thlen meuh chuan MP zawng zawngte hian an bial chhunga khaw 5 tal an chei hman tawh tur a ni. MP zawng zawngte hei hi ti puitling theuh turin ka chah a, Rajya Sabha MP te pawh, District tina khaw pakhat tal model village ah hian kan siam theih chuan, a bul vela khaw dangte pawhin chu model village kalphung chu an entawn thei dawn a ni. Model village, kawng engkima entawntlak hi I siam ang u. October ni 11 hi Jai Prakash Naryan pianchampha a ni a, hei ni a lo thlen hian Sansad Adharsh Gram Yojana kalphung tur kimchang hi ka pharh dawn a ni. State Assembly-a member zawng zawngte pawh an bialchhunga khaw hrang hrang dinhmun thlir chunga Model Village din tur hian ka sawm nghal a, MP zawng zawng leh MLA zawng zawngin an bial chhung theuha Model Village an din fel hun tur chu han ngaihtuah chhin teh, thawk leh khatah Block zawng zawngah Model Village a lo ding thar ang a, chu chuan kan hmathlir hi tihlawhtlingin, kawng thar min zawh tir dawn a ni. Hei vang tak hian 'Sansad Adarsh Gram Yojana' hi kalpui kan tum a ni.

Unau duhtakte u, Sorkarna kan lo siam hlim atang khan Planning Commission chungchangah hian TV leh Newspaper ah te inhnialna tam tak a awm chho reng a, Planning Commission din a nih lai khan a hunin a zir vang te, tulna in a nawr vangte a nih ka ring, mahse kum engemawzat kalta ah khan Planning Commission hian a kalphung mil zelin ram hmasawnna turin hna a thawk a, zah pawh ka zaha, ka chhuang bawk. Mahse tuna kan ram dinhmun hi chu a lo danglam ta a, khawvel sukthlek pawh a lo danglam ta zel bawk a, Sorkar hi ram sum leh pai dinhmun Economics kan tih virvelna ber a ni ta ngawt lo a, chutianga sum leh pai chet velna hmun chu a lo zau ta viau mai, State Sorkar te pawh sum leh paia hmasawnna kawngah dinhmun pawimawhah an lo ding ta a, hei hi kei chuan thil lawmawm lamah ka ngai a ni. India hi hmasawnna kawnga kan hruai dawn chuan State Sorkar te hmasawnna kawng zawh tir hi a lo ngai ta a ni. Kan ram, State hrang hrang inhlawmkhawm a nihna Federal Structure hi kum 60 liamta ai mah khan tunah hian a lo pawimawh zual ta zawk a, hetianga State hrang hrang inhlawmkhawm kan nihna ti chak zual tur te, hmasawnna tura he kan inhlawmkhawmna hmang tangkai zual turte leh tha leh zuala kan inhlawmkhawm theihna turin Prime Minister leh State Chief Minsiter te thawhhona tha zawk a awm a lo ngai ta a ni. Centre leh State tanhona Team chuan hmalam a pan a ngai a, chumi ti thei tur chuan Planning Commission chungchang hi kan ngaihtuah a lo ngai ta a ni. He Red Ford kulh atanga ka sawi duh chu kalphung hlui tak, tuai thar ngai a lo ni ta tih hi a ni a, In hlui cheithat ai chuan a thar sak a that zawk chang a awm ang hian Planning Commission hi thil tha zawka kan thlak a ngai dawn a, chumi chuan ngaihtuahna thar nen, kalphung thar nen min hruai ang a, mipui tam zawk inrawlhna hnuaiah Public Private Partnership ang chi te uarin, kan hausaknate tangkai zawka hmangin, thalaite theihna sawrchhuakin, State Sorkarte rilru mil zawng leh hmasawnna chak zawk a lo awm theihna tur te, State hrang hrang inhlawmkhawm kan nihna Federal Structure tinghet leh zual chungin hma a la dawn a. A tawi zawnga sawi chuan Planning Commission thlaktu tur thil thar kan nei dawn tihna a ni.

Unaute u, vawiin August ni 15 hi Mahharishi Aurobindo piancham a ni ve tho a, Maharishi Aurobindo hi hel rilru pu, Yoga Guru nihna kawng zawh ta a ni a, India tana a duhthusam a sawi thin chu 'India hian Pathian malsawmna leh khuanu pek thil tih theihna a neihte hmangin khawvel tan thil tha tam tak a ti thei a ni' tih hi a ni. Chu thu chiah chu Mahjarishi Arvind pawhin a rawn keng leh a, kei pawhin mihrang kal hmasate thu hi ka pawm a, kan puithiam leh miothianghlim te thusawi hi ka pawm a, he kulh sen atang hian Swami Vivekananda thusawi hi ka sawi chhawng leh duh a. 'Kan nu India lo harchhuak leh chu ka hmu a, Kan nu India chu khawvel hmaah a thu a, India mi zawng zawngte chuan khawvel hringnun nawmna turin hna an thawk suau suau a, he thu ngei hi a ni khawvel tana kan hlan tur chu'. Thiante u Vivekananda thu te hi a daw thei lo a, India khawvel hruaitu ni tura a lo hmuh lawk hi tipuitling turin kan kovah mawhphurhna a innghat a ni. Ram thil ti thei, hausakna tinrenga malsawmna dawnga cheng kan thalaite hian he khawvel tan hian tih theih tam tak an nei a ni.

Unaute u, Ram dangte nena kan inlaichinna chungchang hi sawi hlawh tak a ni a, ram dangte nena kan inlaichinna hi zau taka kalpui theih a nih ka ring. Mahse chiang taka ka sawi duh chu zalenna kan sual lai khan kan vaiin kan tangrual a, then hran kan ni ngai lo, khang hunlai khan tute nge kan lamah tang a, eng ralthuamte nge kan neih? Gandhi kha a awm a, Sardar leh zalenna sualtu maktaduai tam tak an awm anih kha. Zalenna chu kan sual chhuak a ni lawm ni, ramdang min awptute chu kan hneh lovem ni? India atangin kan nawrchhuak lovem ni? kha mi te tho kha kan la ni a, kan thlawhtute chuan kan thil tih theihna hi an lo lantir tawh a ni. India mipuite hian khatianga mi awptu lal ram ropui kha ralthuam tellova an thiah theih chuan thiante u, tuna kan mamawh chu retheihna umbo hi a ni. retheihna hi kan hneh thei dawn lovem ni? ram mipui duhtak vaibelchhe 125 zet te u, retheihna umbo tur hian I intiam ang u. Kan ram thenawmte pawhin he harsatna hi an tawk ve tho a, SAARC ram te nena tangho hian retheihna umbo beihpui hi kan thlawk lovang em ni? kan vaiin tangrual ila, retheihna hi I umbo ang u. Vawikhat na reng reng chu inkahna leh inthahna kal pelin, retheihna umbo turin tangrual ang u. He ram hi Siddharth nun bul tanna a ni a. Sava pakhat chu thal hmanga kah a ni a, unaupa pakhat chuan chu sava chhanhim tur chuan chu thal chu a lo la a nih kha. An nu bulah kalin sava chu tu ta zawk nge, a kaptu nge a lo chhanhimtu zawk? tiin an zawt a, an nu chuan, a chhanhimtu zawk ta a ni e a lo ti a nih kha. Chhanhimtu chuan thattu aiin thil a ti thei zawk a, chuvang tak chuan Buddha ah a lo chang zui ta a nih kha. Hei vang tak hian kan ram thenawmte pawh retheihna umbona kawnga min thawhpui turin ka sawm a, tichuan SAARC ramte hian he khawvela kan pawimawhna hi tipungin ram thil ti thei nihna ah kan inhlangkai dawn a ni. Hemi ti thei tur hian retheihna umbo tura kan thawhho a ngai a, Bhutan leh Nepal ka tlawh a, SAARC ram hruaitu mipawimawh tak tak te pawh an lo tel a, hei hi a bul tanna tha tak a ni a, rah tha pawh a chhuah ngei ang, Kan ram India hi khawvel tana thil tha ti tu ni thei tura inpek a duh a, chumi ti thei tur chuan hmalam panin kan kal zel a ni.

Unaute u, Vawiin August ni 15 ah hian kan ram tana engemaw tal ti turin kan intiam tur a ni a, kan ram tana mi tangkai ni ila, kan ram hmasawnna turin intiam thar ang u, Unaute u hei hi ka tiam che u a ni, Sorkara ka thawhpui te pawh hei hi ka tiam a ni. Darkar 12 hna in thawh chuan kei chuan darkar 13 hna ka thawk ang a, darkar 14 hna in thawh chuan darkar 15 ka thawk ang. Engvangin maw? a chhan chu in zingah hian Prime Minister angin ka lo tel lova, chhiahhlawh hmasa ber, First Servant angin ka lo tel a ni. Sorkar ka siam chhan hi awptu tur nilovin, chhiahhlawh anga hna thawk turin a ni. Unaute u, hei hi ka tiam che u a ni, he ram hian tum ram a nei a, khawvel tana thawk turin. Pu Vivekanand khan a lo sawi tawh a, India hi a lo piang a, a tum ram thleng tura piang a ni. mipui vaibelchhe 125 te hian kan ram tan hmalam kan pan a ngai a ni.

Kan ram venhim hna thawktu Sipaite te inpekna ka chhuang a, Para military force leh kan nu India venhim hna thawktu zawng zawngte chibai ka buk nawn a, ram mipui zawng zawngte hnenah pawh 'Inring leh harvang taka awm reng hi zalenna tura aman kan pek a ni tih ka hrilhnawn duh a, kan sipaite inring rengin an awm a, keini pawh inring leh harhvang taka awmin, kan ram hi hmasawnna rahbi thar chuan kai pui ila, he inpekna thar nen hian in chakna zawng zawng nen min thlawp tlat turin ka sawm a che u.
 

Bharat mata ki jai, Bharat mata ki jai,
Jai Hind, Jai Hind, Jai Hind.
Vande Mataram, Vande Mataram, Vande Mataram!

PIB/Aizawl/Mizo 15.08.2014




 

 

PIB, Aizawl

This site is designed and hosted by National Informatics Centre, Mizoram State Unit
Information is provided and updated by : Press Information Bureau