India Portal

Media in Mizoram
English
Mizo
Achieve
Current Photo
Archives
Contact Information
About us
Accredited Journalist
 
 
 

INDEPENDENCE DAY-A PRIME MINISTER THUSAWI LANGSAR ZUALTE

Dated Aizawl, the 15th August 2014

 

1. Ram mipui duhtakte u, Independence day ni ropui tak lo thlengah hian mipui chhiahhlawh pawimawh ber chuan duhsakna sang tak ka hlan che u a, In zingah hian Prime Minister ang nilo in chhiahhlawh dinhmun pawimawh ber angin ka lo tel a ni.

2. Ram in zalenna a neih theihna tura zalenna sualtu zawng zawng leh an nunna hlantute zahna chibai ka buk a ni.

3. Independence Day hi rahbeha awm mekte, retheihna in a sal beh te, awpbeha awm mekte chhanchhuak tura intiam tharna ni a ni a, an tana engemaw tal ti tura intiam tharna ni tur a ni.

4. Hmalakna reng reng chu rampum tana tha ber tur a ni em tih a tehna pawimawh ber a ni tur a ni a. Chutiang taka nung tura kan intiam chuan zalenna kan lawmna hi India tan rahbi thar kaina tur a ni ang.

5. He ram hi roreltute din chauh nilovin, loneitute, hnathawktute, Nu leh hmeichhiate, thalaite, Pathian mi leh puithiam te, zirtirtute, scientist leh khawtlang rawngbawltute din a ni.

6. Naupang khaw tereuhte atanga lo chawr chhuak leh chhungkaw rethei tak atanga lo chawr chhuak pawhin vawiinah hian Red Ford-a kan hnam puanzar chibai buk theihna hun remchang a nei a, Hei hi India Democracry ropuina, sum leh paia a hlut zawng chhut sen loh, kan ram danpui duangtute min pek a ni a, zahna chibai ka buk a ni.

7. Zalenna kan neih hnua Prime Minister lo ni tawh zawng zawngin kan ram hmasawnna ah hian dinhmun pawimawh an luah vek a, chutiang bawkin, Sorkar leh State Sorkar te pawhin hmasawnna kawngah hian an thawh hlawk vek a ni.

8. Tunah hian kan ke pen rual ila, ngaihtuahna seng tlang ila, harsatna chingfel tlang ila, kan ram hi hmasawnna lamtluang I zawh tir ang u. Kan ram mipui vaibelchhe 125 te hian kan ram hi hmalam panin kan kal tir zel a ni.

9. Tam zawk nihna chhuanga hnathawk kan ni lo a, inlungrualna tha tak nena hmalam pan kan duh a ni.

10. Parliament Member zawng zawngte leh Political party te pawh Red Ford kulh ropui atang hian chibai ka buk a, Nimin ah Parliament Session kan zo fel a, inlungrualna nena hmalam pan kan tumna pawh a takin kan lantir a ni.

11. Delhi ka lo thlen hnua thil awmdan kan hriat chian hnu hian, Sorkar pakhat chhungah nisi thuneitu zawk chiang lo nuai engemawzat a awm niin ka hmu a, hengte hian mahni lalna rambial theuh neiin, intihbuaina leh inrem lohna an nei fo tih ka hmu a. Sorkar nghet leh hlawm tha siam turin bul ka tan nghal a ni.

12. Sorkar leh a pengte kalphung leh hnathawh dan chu chak zawk leh awmze nei zawkin mipuite beiseina tipuitling tura siam a ngai a ni

13. Peon atanga Cabinet Secretary thlengin Sorkar hnathawk zawng zawngte hian theihna an nei vek a. An vaiin thuneihna leh tawn hriat an nei theuh a. Chung an thuneihna leh an theihna te chu kan ram tana hman tangkai ka tum a. hei hi ka ti ngei bawk ang.

14. Kan hruaitu ropui takte khan zalenna an lo hlawh chhuak a, India awm dan tur an lo suangtuahna te tihpuitlin chu kan mawha tla a ni dawn lawm ni, Kan ram hian mize bil a nei a ni lawm ni, heng thilte hi ngun thluk taka kan ngaihtuah a hun ta a ni.

15. Ram mipui vaibelchhe 125 te hian hma thar an lakna apiang chu ram tana tha ber tur a ni tih ngaihtuah theihna an nei lovem ni.

16. Engkim hi mahni tan bik a ni lo a. Thil thenkhat hi chu ram tan bik a ni a, tupawhin mahni chauh inngaihtuahna hneh-a ram tana thil tha zawk tur an dah pawimawh a ngai a ni.

17. Hmeichhia pawna a chhuah dawn chuan nu leh pa ten zawhna tam tak an zawt hmasa thin, mahse chung nu leh pa te chuan an fapa te'n tute nge an kawm thin tih leh khawnge a kal dawn tih te, engvanga kal chhuak tur nge a nih tihte an zawt ve ngai em? Pawngsualtute hi tute emaw fapa an ni vek si a.

18. Nepal ram chuan thalaite ralthuam daha zirna chhunzawm tirin entirna tha tak a lo siam tawh a. Hei hian khawvel puma thalai, tharum thawh duhna rilru pute kawng dikah a hruai thei ang.

19. Zalenna kan neih hnu pawh hian chi leh chi inthliarna leh sakhaw thila intihbuaina chuan min la tibuai fo ta reng a, he thil hi engchen nge kan la buaipui dawn, tunge a hlawkna tel reng reng le?

20. Kan ram thalaite hi heng chi inthliarna, sakhaw inthliarna leh inlak hran tumna thinlungte hian ram hmasawnna tur a dal a ni tih hre nawn turin ka chah duh a. Kum 10 chhung ngeiin hetiang thil thalo hi kan tibo vek tur a ni.

21. Commonwealth games ah khan kan infiammi 64 ten medal an la a. heng zingah hian mi 29 chu hmeichhia an ni, heng fanu duhawm tak takte hi kan chhuang tur a ni.

22. Kan ram hmasawnna tur hian kalkawng pahnih chiah a awm a, chungte chu Sorkar inrelbawlna tha leh hmasawnna hna thawh a ni. Heng kawng chi hnih chiah hi kan zawh tur a ni.

23. Chhungkaw tam tak, Vaibelchhe engemawzata tamin Mobile Phone an neih laiin Bank Account erawh an nei si lo, he dinhmun hi kan thlak a ngai.

24. Sorkar hnathawkte hian an hna tur dik tak thawk lovin Sorkar hnathawk an ni satliah a, he rilru hi thlak a ngai a ni.

25. Han ngaituah chhin teh, kan ram mipui vaibelchhe 125 te hian hmalam panin pen khat theuh pen ta se'ng, kan ram chuan pen vaibelchhe 125 a pen ngal dawn tihna a ni.

26. Tu pawh Pradhan Mantri Jan Dhan Yojana hnuaia Account hawng thar chu Debit Card pek nghal a ni dawn a, Insuarance cheng nuai 1 a tihsak nghal a ni bawk ang.

27. Kan rama miretheite hi Pradhan Mantri Jan Dhan Yojana hnuaiah Bank Account neih tir vek kan tum a ni

28. Kan ram hi Khawvel ram naupang berte zinga mi a ni a, Hman tlak thiamna nei tura inzirtir hi kan ram hmasawnna tura kan hmalakna tur pui ber a ni.

29. Thalai hnathawh tur siam thei turte chu tihhmasawna chawikan ka duh a ni.

30. Thalaite tana hnathawh tur tam zawk siam kan duh chuan thil siamchhuahna lam kan tih hmasawn a ngai a ni.

31. Thiamna kan nei a, talent leh mahni inthununna tha bakah tih duhna thinlung kan nei a. Khawvel tan hian remchanna zau taka hawn ka duh. Lo kal ula, India hi rawn siam teh u, chakna kan nei a, kan ramah hian lo lut teh u, ka sawm che u a ni.

32. Sipai ten kan ram an venghim angin Loneitute hian kan buhzem an chhung khat a, chuvangin ram rawngbawlna pawimawh tak a ni.

33. Kan thalaite hian thil te tham te pawh nise, ram pawn atanga kan chawk luh thin thil engemaw tal siamchhuak tura an rilru an siam chuan tunhnu zelah ram pawn atanga chawk luh kan ngai tawh dawn lo a ni.

34. IT lam thiam thalaite hian khawvel mit hmuhah India nihna an phochhuak tawh a ni.

35. Digital India tih hi kan ram hruai thlen kan tumna a ni. Digital India tih ka sawi hian mihausa te tan chauh ka sawi lo a, miretheite tan a ni.

36. Electronic digital India tih thupui kan tihhlawhtlin hun chuan Electronic Bungrua tam zawk kan siamchhuak ang a, mahni kan intodelh bakah kan ram tihmasawntu pawimawh tak a ni ang.

37. Thawk khat lai khan Rail kawng hian kan ram a tipumkhat a ni tih sawi a ni thin a. Vawiinah chuan IT hian kan ram leh mipui inpumkhatna a thlen dawn a ni.

38. Tourism tihhmasawn hi kan duh a. Tourism hian mirethei bak berh te thlengin hnathawh tur a siam a. Dawr te kai te, Auto Rickshaw khalhtute, eitur chaat zuartute, thingpui dawr siam te chenin an hlawkpui a ni. Thingpui dawr siam han tih hian engtizawng emaw takin hnai riaua inhriatna ka nei nghe nghe.

39. Kan ram hmel ti mawilo tu ber pakhat chu kan vela bawlhhlawh tam lutuk hi a ni. He hmun ka lo thlen a, Sorkar tana ka thawh hmasak ber chu thenfai hna a ni. Mite pawhin mak an ti a. Hnawmhnawk thenfai chu Prime Minister hna a ni reng em ni, mahse keia tan chuan hna lian leh pawimawh tak a ni.

40. Ram mipui vaibelchhe 125 te hian bawlh hlawh paih darh lo tura thutlukna an siam phawt chuan, khawvel eng ram mah hian kan khua leh khawpuite hi min tih bawlh hlawh sak thei lo tawp ang.

41. Kum 2019 ah chuan, Mahatma Gandhi a pian champha vawi 150th na kan lawm hunah chuan kan khua, kan khawpui, kan ram, kan school kan veng, temple, damdawiin leh hmun dang reng reng a bawlhhlawh tawh tur a ni lo tiin thutlukna siam ila. Hei hi Sorkar tih tur chauh a ni lo a, mipuite nen tangrual chauha tih hlawhtlin theih a ni.

42. Tunah hian kan nu te, kan farnu te khawlai remchang laiah an inthiar a ngai a, hei hi tha kan ti reng em? an tana Inthiarna mumal tak siamsak hi kan mawhphurhna a ni lo vem ni?

43. October ni 2 atang hian Swachch Bharat campaign chu bul tan turin ka hawng a, hei hi kum 4 chhung kan kalpui ang.

44. Vawiina bul ka tan nghal duh chu India rama School zawng zawngah inthiarna tha siam leh hmeichhiate hman tur bik inthiarna siam vek a ni. Hemi kan tihpuitlin hnuah chauh hmeichhiate zinga school bang awm thin kan tibo thei ang. MP zawng zawngte pawh kum khat chhunga MP Fund an neih tal School-a inthiarna siamsakna atana hmang turin ka phut a ni.

45. Nakum August ni 15-a he huna kan din leh hunah chuan, School zawng zawngah mipa leh hmeichhe inthiarna a hrangin kan nei vek tawh tih kan chiang tawh tur a ni.

46. MP hlui hming chawiin - ’Saansad Adarsh Gram Yojana’ tih hma thar lakna tur chu vawiin hian ka puang a. MP zawng zawngin an bial chhunga khaw pakhat zel he scheme hnuaiah hian Model Village ah an siam dawn a ni.

47. MP zawng zawngin khaw dang pahnih tal chu 2016 hnu, 2019-a inthlanpui neih leh hma ngeiin an cheibawl leh ang a, chumi hnu ah chuan kum 5 chhungin MP tinin khaw 5 tal Model Village ni tur hian an cheibawl ang.

48. Saansad Adarsh Gram Yojana kalpui dan tur ruahmanna hi MP zawng zawng bakah State Sorkar zawng zawng hnenah 11th October hma ngeia pek vek a ni ang. (Jayprakash Narayan’s Jayanti)

49. Planning Commission kalphung leh hnathawh dan pawh her danglam a ngai dawn a, Central Sorkar leh State Sorkar inrelbawlna, kan federal structure ti phuisui zawng leh Centre leh State Sorkara thawhhona tha zawk a awm theihna tura kalpui a ni ang.

50. State Sorkar te ti chakin, Central leh State inlaichinna ti nghet zualin, ngaihtuahna thar, rilru thar leh hma thar lakna nen, thil thar kan siam ang a. Tun atanga reilote ah hei hian Planning Commission aiawhin hna a thawk ang.

51. India-in Pathian malsawmna a dawn leh thlarau lama hausakna a neihte hi khawvel hamthatna atan tangkai taka chhawr a ni ang a. He ngaihtuahna hi Shri Aurobindo khan a lo sawi tawh a ni.

52. Swami Vivekananda sawi angin, Kan nu ropui India chu a thang harh leh ta a, Kan nu ropui India hi khawvel tan zirtirtu a ni ang a, India mi zawng zawngte pawh Khawvel tana malsawmna thlentu an ni ang.

53. SAARC ram zawng zawngte hian engahnge retheihna hi beiletin kan hneh loh teh lul ang.

54. Bhutan leh Nepal te ka tlawh a. SAARC ram te atangin mi pawimawh tak tak lakluhna inkhawm chhimin an lo tel ve a, hei hi bul tanna ropui tak a ni a, rah tha a chhuah ngei ang.

55. Hei hi ka tiam a che u, Nikhatah darkar 12 hna In thawh chuan kei chuan darkar 13 zel ka thawk ang. A chhan chu Prime Minister nilovin Chhiahhlawh pawimawh Prime Servant ka nih vang a ni. He Sorkara ka lo awmna chhan hi ram awptu tur nilovin chhiahhlawh hna thawk tur zawkin a ni.

56. Ram venhim hna thawktu sipai leh Para Military Force te kan ram venghimtu an nih vang leh kan ram tana mahni inhlan ngam an nih vangin lawmpuina ka hlan a ni


PIB/Aizawl/Mizo (Two)15.08.2014

 

PIB, Aizawl

This site is designed and hosted by National Informatics Centre, Mizoram State Unit
Information is provided and updated by : Press Information Bureau