Dated Aizawl, the 22nd March 2010

Kum 2010-11 atana Mizoram Annual Plan chu Planning Commission Deputy Chairman Shri Montek Singh Ahluwalia leh Mizoram Chief Minister Pu Lal Thanhawla-ten New Delhi-ah an ruahman fel ta. Annual Plan hi Cheng Vaibelchhe 1,500 a ni a, hetah hian state mamawh zual project hrang hrang bawhzuina tur Additional Central Assistance Cheng vaibelchhe 70 a tel.

Planning Commission Deputy Chairman Montek Singh Ahluwalia chuan State hnathawh dan fakawm a tih rualin hmasawnna ruhrel dinna tura Private Sector-te inrawlhna tur kawng State sorkar chuan a ruahman tul a tih thu a sawi a. Thirteenth Finance Commission chuan he State tan hian fund pek belh a tum thu sawiin Horticulture, Fisheries leh Forestry lam ngai pawimawh tura a duh thu Ahluwalia hian a sawi bawk.

Ahluwalia hian State sorkar chu chhiah atanga sum hmu tlem a nih avangin chhiah tipung a, a hmangtuten a awm tawk pawisa an chawi ve theihna tur leh chhiah lak lohna thil danga chhiah lak dan kawng an dap a tul thu a tarlang bawk.

Chief Minister Pu Lal Thanhawla pawhin State sorkar chuan hmasawnna ruhrel din kawnga private sector-te an inrawlh ve theihna tura theihtawp chhuah a nih thu a sawi a, mahse, a awmna hmunin a zir loh avangin Mizoram state chuan harsatna a la tawk nasa hle tih a sawi ve bawk a. State sorkar policy-ah chuan Public Private Partnership (PPP) hmanga project a tam thei ang ber bawhzui tura ruahman a nih thu a sawi.

Pu Lal Thanhawla hian Planning Commission chu tuna project bawhzui mek, a bik takin Rajiv Gandhi Sports Complex thawh zawhna tura special central assistance pe turin Planning Commission chu a ngen bawk.


MT/CLS/LTS
 

PIB, Aizawl