India Portal

Media in Mizoram
English
Mizo
Achieve
Current Photo
Archives
Contact Information
About us
Accredited Journalist
 
 

 

11-July-2012

 

COMMUNAL HARMONY

Feature

Home     

      India hi ram zau tak a ni a, a chhungah hian sakhaw  hrang hrang betute chu kum za chuang zet inngaih takin an lo cheng ho tawh a, ingaihdamtawna, inhumhalh tawnin, inpumkhat leh inngaih taka cheng hoin hei hian India chu ram ropui leh chak takah a siam a ni.

 Ram danpui chuan India chu sakhaw zalenna Secular Country-ah puangin hnam hnufual leh sakhaw te zawkte dinhmun chu tha takin a humhalh sak a. Sakhaw hrang a nih avangin tumah thlei bik a nei lo a, mitinte chu angkhat vek a enin intluk tlang takin a hrut rual a ni. Hetih lai hian ngaihsak lo leh hrang bika inhriatna awm thei laka invenna tur ruahmanna tha tawk siam a ni thung. Sorkar chuan ramchhunga sakhaw zalenna leh hnam hrang hrangte lungrual taka an chen ho chu a duh ber a ni a, hetiang tur hian kawng hrang hrangin hma a lak bakah dan leh hrai kenkawh kawngahte, khawtlang inrelbawlna, mipui vantlang hmasawnna ngaihtuahna leh kawng hrang hrangah hma ala thin a ni.

 Kum 2009-a Communal Harmony Award semna inkhawmah Prime Minister Dr Manmohan Singh chuan sakhaw hrang hrang betute leh hnam hrang hrangte hian inpumkhatna tha zawk kan neih a ngai a ni, a ti a, India chu sakhaw hrang hrangte tan inpui a ni a, sakhaw thenkhat chu India atanga piang chhuak niin, sakhaw thenkhat dangte pawhin nghet takin bu an khuar a ni. India-ah hian kum za chuang tehmeuh sakhua leh hnam hrang hrangte chu inngaih tak leh intluk tlang tak mai ni loin anmahni indawm kang tawnin an lo cheng za tawh a, hei hi khawtlang leh ram ropui  dinnaa kawng pawimawh tak pakhat a ni a. Sorkar leh mipui tangrual pawlte chuan sakhaw chhuanlama hmanga mimal leh pawl thenkhatten tharum an thawh thin titawp tura kan tangrual a ngai a, eng sakhua mahin tharum thawh zawnga hmalakna an thlawp ngai lo a, midangte haw tur leh an harsatna siam zawnga hma la turin an ziritir ngai hek lo. Sakhua behchhana hmanga tharum thawhna, inlak hranna leh midangte ngeih lo zawnga chet chingte chu an awmna sakhaw betute tan mi rintlak leh zui tlak an ni ngai lo a, chuvangin hetiang mite hi kan theih tawpa kan do let a ngai a ni. Vawiina sakhua leh hnam inpumkhatna atan thawktute kan chawimawi ang hian hetiang kawnga theihtawpa hmalatute hi kan chawimawi thiam ve tur a ni a, hei hian kan ram chu ram nuam lehzualah a siam dawn a, chu chu mitin tena kan mawhphurhna a ni tih kan hriat a ngai a ni, a ti.

 Hnam pa Mahatma Gandhi chuan, “ sakhaw inlak hranna leh inlak bingna awm thin chu thil chin tha lo tak a ni a, hei hian mimal nunah nghawng tha lo tak a neih theih avangin hetiang awmthin titawp tur hian hma kan lak a ngai a ni,” a lo ti tawh bawk a ni.

 Sorkar chuan sakhaw inpumkhatna tha a awm zel theih nan hmalakna hrang rang a kalpui thin a. Hemi atan hian National Integration Council (NIC) chu kum 1960 khan kalpui a lo ni tawh a, kum 1992 khan National Foundation for Communal Harmony kalpui a lo ni tawh bawk. NIC ah hian hnam hrang hrang atangin aiawh ruat thin an ni a, an ni bakah hian Union Minister leh State hrang harang Chief Minister te chu member atan ruat thin an ni a, heng mite hian sakhaw hrang leh chi leh chi inkara inhmuhthiam lohna awmthin tihtawp dan tur uluk takin a ngaihtuah thin a, sakhua leh hnam hrang hrangten lungawi lohna an neihte dawhthei takin a ngaihthlak sak thin a ni.

 National Foundation for Communal Harmony (NFCH) in a tum ber chu India-a sakhaw inlak hranna leh tharum thawhna thleng thin tihtawp a, ram mipuite a bikin naupang leh thalaite inngaih taka an chen za theih nana hmalak a ni a. Hemi atan hian NFCH chuan sakhaw hrang hrangte inngaih taka an awm theih nan hma lain, ram inpumkhatna neih zel a tulna leh inthenhran that lohna uar taka zirtirin a thehdarh a, hetiang tuartu a bikin naupangte zawngchhuakin rilru dik an put theih nan a tanpui thin a, hetiang tuartu naupangte chu tanpuina pawisa fai pek thin niin, zirna leh thiam thil dang training te pek thin an ni. State sorkar, tlawmngai pawl leh pawl thenkhat dang kaltlangin sakhaw inpumhatna leh ram inpumkhatna lamhawi ziritrna pek thin a ni a, sakhua leh ram inpumkhatna lam hawi zawnga hna thawk thate nenah chawimawina pek thin a ni bawk. Tanrualna neih that zia leh hlawkna lam hawi zawng tarlang tura hmalak thin a ni a, tharum tello a nun awmze nei hman thatna leh hlawkna nei tura mipui sukthlek kaihhruai tura hmalak thin a ni bawk.

 Hnial rual lohin sakhaw inpumkhatna a awm theih nana hmalkna te, sakhaw hrang leh chi leh chi inthliarna leh hetiang lam hawi hmalkana tihtawp a nih theih na kawngah hian State sorkar chuan mawhphurna pawimawh tak a chelh a, sorkar laipui chuan hemi kawnga hmalaknaah ruahmanna zawm tur  inkaihhruaina felfai tak a duang a, hemi hnuaiah hian khawtlang inrelbawlna, sorkar kalphung leh chhawmdawl hna thwh dan fel tak a awm a ni. He ruahmanna hi a nih tur leh dik taka zawma kalpui a nih chuan sakhua leh chi hrang inkara buaina chhuak thin chu a nasat leh punlun hmaa chinfel leh tih reh theih a ni dawn a ni.

 Sorkar laipuiin sakhua leh chi hrang inkara buaina chhuak tur veng tura inkaihhruaina dan a siam hi a pawimawh hle a, he ruahmanna hi District tina thuneituten an huamchhunga hetiang hawi zawng harsatna a thlenin khauh takin an kengkawh tur a ni a, hei bakah hian hetiang buaina chhuah awlsamna hmunahte a bikin hmalakna an kalpui tur a ni. Police officer te pawhin hetiang buaina chhuah mai theihna hmunahte hian uluk takin thil awmdan an enfiah thin tur a ni a, a tul dan a zir zelin hetiang hmun hi tlawhin tualchhung mite leh sakhaw hruaitute thil awldan an sawipui thin tur a ni bawk. A tul angina heng hmunahte hian atul huna hnathawk thei tur dah tur a ni a, hnaruak wmte hnawhkhat zung zungin hnathawk theia siam tur a ni. Buaina chhuah thut theihna  Sensitive leh hyper-sensitive area-ahte hian a tul huna hnathawk mai thei turin ruahmanna felfai tak kapui tur a ni a, aurinna hmanga midang leh sakhaw dangte tana ngaihthlak nuam lo zawnga thusawi awm thin chu buaina chawkchhuaktu a nih theih avangin hetiang hi thleng lo tura enfel thin tur a ni. Sakhaw thila punkhawm leh a huhoa thil tih hian sakhaw hrang inkarah inhmuhthiam lohna leh inghirnghona a chawk chhuah theih thin avangin hetiang nikhuaah hian fimkhur taka thil kalpui thin tur a ni a, tluang taka hun hman a nih theih nan skhaw hruaitu rintlak leh zahkai deuhten mahruai thin se a tha hle a ni. Punkhawmna leh puipunna hmun video leh thildang hmanga lo record hi buian chawkchhuaktu pakhat a ni thei bawk a, buaina chawkchhuak thei thil hrang hrang ngaihtuah chungin thuneitute chuan hmalak an kalpui thin tur a nih bakah sakhaw hmun pawimawha bungruate tihchhiat a nih loh nan theihtawp an chhuah thin tur a ni.

 Inkaihhruaina danin a tarlan angina heng buaina chhuah maitheihna hmuna venhim hna thawk tura dah Police Force te hi a awmna huam chin zelah khawtlang hrisel a awm theih nana hmalatura beisei an ni a, hei bakah hian sakhaw hrang leh hnam hrangten inngaih taka an awm theih nana palai hnathawk tura beisei an ni. Heng hmuna Police leh dan leh thupek kenkawh hna thawktur hian mirinawm, taima, hleihneilo leh sakhaw tih bik leh tan bik nei lo dah thin tur a ni. Henglai hmuna hnathawktu tupawhin buaina leh inhmuhthiam lohna a chhuah loh nan  danin thuneihna a pek ang zelin khauh takin dan a lekkawh thin tur a ni a, hetiang tur hian dirtrict thneitute pawhin hnathawktte chu thuneihna an pe thiam tur a ni.

 Heng buaina chhuah mai hlauhthawnna hmunahte hian dawr te nghaktute, sumdawnna enkawltute leh nitina inhlwhfa chawpa eizawngtute chu buaina chhuah thulha tuar hmasa tura ngaih an ni a, heng mi tam berte hian insurance an neih dawn loh avangin buaina chhuaka bungrua leh an sum lakluhna chhia chuan an nitin khawsak phung mamawh thlengin a nghawng dawn a ni. Hetih lai hian heng mite hi buaina tireh tur leh remna leh muanna a awm theih nana hmalakpui tur tha tak an ni ve thung a, chutiang bawkin buaina chhuak tuartu zinga hmeichhiate chu hetiang lama hmalakpui theih tura ngaih an ni a, District thuneitute chuan hetiang hmunah hian buaina a reh zung zung theih nan remna leh muanna a awm theih nana hmalakpui tur an hre thei dawn a ni.

 India-ah hian tlawmngai pawl hrang hrang leh mi inpeten remna leh muanna a awm theih nante, inpumkhatna tha leh sakhaw rang betute inkara inremna a awm theih nan hmalakna ngawrh takin an kalpui reng a. Heng pawlte hian helam nathawktute chu fuihin zirtirna a pe thin a ni. Buaina a chhuah thulhah District thuneitute chuan heng remna leh muanna a awm theih nana hnathawktute hi a tanpui thin tur a ni a, buina titawp turin theihtawp an chhuah thin tur a ni. Buaina a chhuah reng rengin thuneitute chuan buaina titawp turin hmalakna an kalpui nghal tur a ni a, a tul a nih chuan pawnchhuah khapna thupek chhuahin curfew an puang ang a, uaina chhuaka mawhphurtute manin thubuai a siamsak thin tur a ni a, hetih lai hian buaina chhuaka mawhphurtute hrem kawngah fimkhur taka thil kalpui thin tur a ni a, a tul a nih chuan buaina chhuahna hmunah hian thil awmdan enfiahturin Special Investigation Tea (SIT) tir luh thin tur a ni.

 A hun taka buaina chhuak tuarte tanpuina leh inenkawlna tur sum pekchhuah theih loh hi buaina leh thinrimna dang chawkchhuaktu a ni thin a, chuvangin buaina chhuaka bungrua leh thildang chhiaa zangnadawmna leh tanpuina pek chhuah tur chu a rang thei ang bera pekchhuah thin tur a ni. Hetih lai hian zangnadawmna leh tanpuina pekchhuah turah reng reng inthliarna a awm tur a ni lo a, thuneitute chuan hetiang aa wm leh awm loh an enfiah hmasa thin tur a ni. District thuneitute chuan buaina tuartu mipuite chu chhawmdawlna  ngaihtuah sakin eitur chaw, bawnghnute, damdawi, tuithianghlim intur leh kawlphethate an ngaihtuah sak nghal tur a ni a, a tul a nih chuan mipuite chu riah lailawkna tur relief camp ngaihtuah sakin venhimna khauh tak an pe ang a, damdawia inenkawlna tur ngaihtuah sakin an chhawmdawl nghal tur a ni. Buaina chhuaka bungrua leh thil dang tihchhiatte senghawi vatin, a tul a nih chuan buaina chhuaka in leh lo chanten in leh lo an din thuai theih nan sum leh pai hmuhna tur gaihtuahpuiin loan te an ngaihtuah sak tur a ni.

  Sorkar laipui chuan a firfiaka chete kut tuartu leh sakhaw hrang leh chi hrang inkara buaina chhuak tuarte tanpuinatur ruahmanna a siam a, hemi hnuaiah hian heng buaina tuartu chhungte chu zangnadawmna cheng nuai 3 pek an nih thin bakah chhawmdawlna leh tanpui dang pek belh theih an ni bawk a ni.

 Sorkar chuan sakhaw behchhana tharum thawhna thleng thei leh politics leh thil danga hamhat duhna avanga hmalakna awm thei venna tur turin “The Religious Institution (Prevention of Misuse) Act, 1988” chu a lo ruahman tawh a, he dan hian sakhaw biakna hmun enkawltute chu a ni lo zawnga sakhaw hmun pawimawh hmang an awmin Police hnena hriattir zel turin a phut a, hei bakah hian sakhaw biakna hmuna silai leh hmanraw dang thuhruk pawh a khap tel nghal bawk a ni.

 The Place of Worship (Special Provision) Act, 1991 chuan sakhaw biakna hmunte chu inkhawmna leh tawngtaina atan ni lo thil dang atana hman chhawn chu khauh takin a khap a. Dan in a sawi angina sakhaw hmun leh a enkawltute chuan sakhaw biakna hmun reng reng chu politics lam hawi thuthehdarh nante, dan pawna hnawlte inhumhim nan leh a tha lo zawnga hman an phal tur a ni lo a, hei bakah hian silai leh silai mu chhekkhawl nan an mang tur a ni lo a, phalna an nei a nih o chuan relhrukna theihna tur leh tawmruk theihna tur hmun reng reng an siam tur a nih lo bawk. Heng sakhaw biakna hmun hrang hrangte hi dan kalha chet lakna hmun atan hman tur a ni lo a, tawng hrang, chi leh hnam hrang inkara inhmuhthiam lohna thlen theih hmlakna lam hawi reng reng danin khauh takin a khap tlat a ni.

 Sakhaw hrang hrangte chuan midangte hmangaih tur leh an ni nena in unauna tha nei turin zirtirna an kalpui thei a, an thurin bulpuiah inrem lohna, huatna leh tharum thawhnain a thlen theih thil tha lote an zirthin a. Hetih lai hian mi thenkhat chuan mahni hmasial leh hlawkna duh vangin a dik lo zawng leh a kawi zawngin ziritrna an kalpui thin a , hei vang hian thil leh te thamteah buaina a chhuah phah fo a ni.

 India hi ram thang mek leh economy thang chak tak a ni a. Ram hruaitute hmathlir chu ram changkanga India chu hlankai bakah economic tha taka neia siam a ni a, hetih lai he ruahmanna hi ramchhung himna, a bikin chi leh sakhaw hrang hrang inlungrual leh ingaihna tel lo chuan a hlwhtling thei dawn lo a ni. Sakhua leh hnam hrang hrangte inlungrual leh inngaih taka awm chu sorkar duh dan leh hmathlir lian tak a ni a, hetianga remna leh muanna leh inrin tawnna a awm theih chuan sakhaw hrang inkarah inlaichinna tha tak a awm thei dawn a, hei hian India chu ram hmasawnna leh changkangah a hruai thei dawn a ni.

PIB, Aizawl

This site is designed and hosted by National Informatics Centre, Mizoram State Unit
Information is provided and updated by : Press Information Bureau