India Portal

Media in Mizoram
English
Mizo
Achieve
Current Photo
Archives
Contact Information
About us
Accredited Journalist
 
 

 

EI LEH BAR LEH KHAWTLANG HMASAWNNA ATANA DOORDARSHAN PAWIMAWHNA

Mipuite hnena thu leh hla thehdarhtu hmanraw pawimawh leh tangkai ber, television hi ei leh bar leh khawtlang hmasawnna turah pawimawhna lian tak a nei tih chu thu dik awmsa ang tluk a ni. Mipuite tan liau liaua thu leh hla thehdarh hna thawktu, Doordarshan hi kum 1959-a a din tan atang khan ram ei leh bar leh khawtlang hmasawnna hna thawhna kawngah tun thlengin hma hruaitu a la ni reng a ni.

Tun dinhmunah hian ramchhung leh rampawnah TV channel 300 bawr vel pechhuak mekin thlirtu a neih belh zel theih nan ruahmanna thar chi hrang hrang a duang chhuak zel bawk a, ram ei leh ber leh hmasawnna tura hmalakna, a nih ang taka mipuite hnena puanchhuah chu Doordarshan mawhphurhna a nih angin hei hi a pawimawhzia ti zualtu a ni reng a ni.

Tunah hian Doordarshan hian channel 30 leh DTH service a nei a. Heng channel zingah hian national channel 5 (DD1 National, DD News, DD Sports, DD Bharati, DD Urdu) bakah regional language satellite channel 11 (DD Bangla, DD Oriya, DD Saptagiri, DD Podhigai, DD Chandana, DD Malayalam, DD Sahyadri, DD Gujarati, DD Punjabi, DD Kasir, DD North-East), regional service state network 111 (Rajasthan, Uttar Pradesh, Madhya Pradesh, Bihar, Jharkhand, Chhatisgarh, Haryana, Himachal Pradesh, Uttarakhand, Mizoram, Tripura), international channel 1 (DD India), DD Rajya Sabha, DD Gyandarshan leh DTH (DD Direct Plus)-te a nei a ni.

Heng channel zinga pahnih, DD1 National leh DD News-te chu transmitter atanga boruak su tlanga signal pechhuak thei leh thla lem atanga signal pe chhuak thei chi an ni a. Heng bakah hian regional network leh regional language satellite channel, transmitter atanga boruak atanga signal lo dawngte an awm bawk. Channel dang 3, DD Sports, DD Bharati leh DD India-te erawh hi chu thla lem atang chauha signal dawng thei, satellite channel kan tih ang hi an ni.

Tun dinhmunah chuan transmitter atanga boruaka signal pekchhuahin a huam theih chin chu za zela 79.1 niin hei hi ram mipui zaa 91.4-in an lo thlir thei a ni. Doordarshan DTH service (DD Direct Plus) hian TV channel 36 leh Radio channel 20 neiin a thlawna pek chhuah a ni.

Programme tihchangtlun nan leh tha taka tih chhuah a nih theih nan Doordarshan hian Doordarshan Kendra/Studio 64, Maintenance Center 126, thil chi hrang hrang leh chanchinthar tih chhuahna, Regional News Unit 24 a neih bakah Central Production Center pahnih – Delhi leh Guwahati-ah a nei bawk a ni.

Indian Readership Survey TV Report 2006 (Round 2)-in a tarlan danin ram pumah TV nei chhungkaw maktaduai 217.7 an awm a. TV nei, za zela 56 vel-in cable connection an nei a ni. Khawpuiah chhungkaw 70 zelin TV nei anga chhut a nih laiin thingtlangah chhungkaw 42 zel TV nei anga chhut a ni. Doordarshan chuan DTH service, ‘DD Direct Plus’ hmangin cable leh satellite connection nei lo-te hnenah a thlawnin TV programme pek chhuah a tum a ni.

A tir te atangin Doordarshan chuan ram ei leh bar leh khawtlang dinhmun chawikanna turin a programme tam zawk chu a ruahman a. Agriculture programme te, thingtlang hmasawnna tur programme te, hmeichhia, naupang, chhungkaw dinhmun, adult education, thalai, nundan tha leh thil pawimawh chi hrang hrang, mipuite hrilh hriatna tur programme te a tihchhuah bakah ram ei leh bar leh khawtlang hmasawnna tura hriat tur pawimawh, science & technology leh mihring dan theih loh chhiatna lo thleng thin – tuilian, lirnghing, hri leng etc. mipui hnena puanzar hna a thawk bawk a. DD News channel-ten ramchhung hmun hrang hranga hmasawnna hna thawh dan leh thil thleng pawimawh chi hrang hrangte an puang chhuak reng bawk.

Heng hmasawnna programme-te hi tha lehzuala kalpui an nih theih nan Doordarshan chuan thil chi hnih, Development Communication Division leh Narrowcasting-te a siam a. Development Communication Division hi hriselna leh faina lam hawi bakah hmasawnna tur thil chi hrang hrang thlur bingna a nih laiin Narrowcasting erawh hi chu agriculture leh hetiang lam hawi hmasawnna tura hma la tu a ni.

Development Communication Division

Development Communication Division (DCD) hi Ministry/Department leh sorkar hnuaia Public Sector Undertaking-te, inpawh tlang taka hna an thawh tlai theih nan leh an hnathawhte, mipui hnena puanzarna hmanrua atana Doodarshan-in kum 2001 March thlaa a din a ni a. Sorkar laipuia ministry hrang hrang leh Public Sector Undertaking-te hnathawh leh hlawhtlinna hrang hrang tarlanna tur liau liaua ruahman a ni. DCD hmalakna hi a zau tham hle a, thu leh hla thehdarh dan tura ruahmanna hrang hrang siam leh hemi kawnga harsatna awm sutkian dan tur te, software siamchhuah te leh ruahmanna kalpui dan tur leh heng hmalakna-ten nghawng a neih dan tur thlengin DCD hian a hma tel a ni. Hei bakah hian production tih theihna hmanrua-te neiin, thu leh hla, dik leh felfai taka puan chhuah a nih theih nan ruahmanna a siam thin bakah ramchhunga station hrang hranga chengte tan an hnam tawng theuhin programme a tichhuak a, a lo thlirtute chunga a tha zawng leh tha lo zawnga nghawng a neih dante zirchianna report pawh a tarlang thin a ni. A din tanna la rei lo hle mahse, DCD avang hian Doordarshan atanga programme tihchhuah dan kalphung chuan nasa takin hma sawn phah a, Doordarshan leh AIR tih lar hna a thawh kawp avangin ministry leh department hrang hrang hmalakna-te, inbuk tawk tlang takin mipui vantlang hnenah a puangzar thin a ni.

DCD atanga programme chi hrang hrang tihchhuah hian khawtlang siamthatna tura mipuite hnena an mawhphurhna hrilh hriat kawngah awmze thui tak an nei a. Kum 2002 hnu lama hriselna lam hawi, health communication campaign rei ber, ‘Kalyani’ hi public broadcaster-te pawimawihna, chakna leh theihna nemnghettu programme pakhat a ni. He programme, ‘Kalyani’ hian natna chi hrang hrang, tui hri, kawthalo, T.B, sikserh, iodine tlakchham pawi zia leh HIV/AIDS chungchang te, mipuite hnena zirtirna hna a thawh bakah hriselna leh faina pawimawhzia te, taksa hriselna atana vaihlo/meizuk a pawizia te, nu leh naupang enkawl dan te leh thil dang tam tak, mipui hnena zar a thawk a ni. A hnathawh that avangin ‘Kalyani’ hian chawimawina leh lawmman chi hrang hrang a dawng tawh a, World Day 2006-ah UNAIDS Civil Society Award pek a ni a, Broadcasting Engineering Society of India hnen atangin kum 2006 chhunga vantlang tana hnathawk tha ber chawimawina a dawng a, kum 2005-ah Radio and TV Advertising Practioner’s Association Award a dawng bawk. Heng bakah hian ROSE D’OR Award of Switzerland leh GATES Malaria Award in Commonwealth Broadcasting Award 2004 dawng thei tur zinga chhawp chhuah zingah a tel bawk.

‘Grameen Bharat’ (thingtlang hmasawnna lam), ‘Bhoomi’ (environment lam), ‘Janjatiya Darpan’ (tribal affairs chungchang), ‘Khel Khel Mein Badalo Duniya’ (tuialhthei renchem lam), ‘Jaljivan’ (tui renchem lam), ‘Paisa Hamara Phaisala Aapka’ (sum renchem lam), ‘Aatmaja’ (nausen hmeichhia tihhlum thin chungchang), ‘Aparijita’ (hmeichhe naupang chawikanna lam), ‘Jago Grahak Jago’ (consumer affairs lam) te leh Integrated Insurance Regularity leh Development Authority of India (IRDA) programme, etc-te hi hmasawnna lama DCD-in programme a tihchhuah zingah an tel a ni.

‘Kalyani’ leh HIV/AIDS chungchang inzirtirna lam hawia, DCD hmalakna dang pakhat, Detective series ‘Jasoos Vijay’-te chu kum 2004 January-a Global Media AIDS Initiatives tan a nih khan UN Secretary General hnenah pek a ni a, kum 2005 January-a HIV/AIDS National Media Summit-ah khan India Prime Minister hnenah pek a ni bawk.

Narrowcasting

Ram leilung a zira a micheng-ten hlawkna an tel theihna tur inzirtirna, ‘Narrowcasting’ hi Doordarshan chuan low power transmitter 12 huamchhungah kum 2000 khan tanin a tirah chuan he programme hi a enchhin nan kar khatah tum hnih khat tihchhuah thin a ni a. Enchhinna hi a hlawhtlin em avangin kum 2004 khan PGF center 12-ah lo neih lam hawi programme tihchhuah tan a ni a, he programme atana senso hi Agriculture Ministry-in a tum a ni. He project hi beisei aia a hlawhtlin avangin ramchhung hmun dangah pawh Narrowcasting hma hi tih zauh belh zel a ni ta a ni.

He programme hi Agriculture, Horticulture, Veterinary Science, Fisheries etc-a mithiamte kaihhruainaa kalpui niin Agriculture, Horticulture, Veterinary Science, Fisheries etc. lama hriat tur pawimawhte chu a inchhawka tihchhuah thin a ni a, buhbal hlawk zawka thar chhuah theih dan tur te, hemi lama eizawngte tana hamthatna tur scheme hrang hrang siam te, loneitu hlawhtling-te chanchin, sik leh sa leh thil thar chhuah hralh dan tur thlengin Narrowcasting programme-ah hian tarlan thin a ni.

Narrowcasting hnuaia agriculture programme bakah hian Doordarshan chuan ramchhunga a station hrang hrang atangin heng biala chengte tawng in, nitin deuh thaw agriculture programme a ti chhuak thin bawk.
Programme Evaluation

Hmasawnna programme chi hrang hrang, a bikin DCD leh Narrowcasting programme-te hlawhtlinna leh nghawng a neih dante thlir letna hi a khat tawka neih reng a ni a, tan lak ngaih zualna lai leh tun aia tangkai zawka heng programme kalpui dan turte pawh a khat tawka thlirho reng a ni.

Hmasawnna programme kalpui dan zirtute report-in a tarlan danin heng programme-te hi a entu tur atana an duh tak-ten nitin an en ziah thin a, heng programme-te hi an chhawr tangkai zia thu leh thil thar dang hriat belh zel an chak thute an sawi a ni.

A tawi zawngin, Doordarshan hian telecast hun tam zawk chu hmasawnna lam hawi programme tihchhuahna hun atan ruahmanin thlirtute tana tangkai thei tur leh chhawr tangkai theih tur programme siam chhuak turin theihtawp a chhuah zel a ni. A chunga tarlan tak zawng zawng atang khian ram ei leh bar khawtlang hmasawnna kawnga Doordarshan dinhmun pawimawhzia leh hemi kawnga ramchhunga private channel dang zawng zawng atanga Doordarshan danglam bik zia chu a hriat theih a ni.

*Inputs from Ministry of Information & Broadcasting

Aizawl Office No. A-4/17/2007-Azl 22082007              1530 hrs.
 

PIB, Aizawl

This site is designed and hosted by National Informatics Centre, Mizoram State Unit
Information is provided and updated by : Press Information Bureau