India Portal

Media in Mizoram
English
Mizo
Achieve
Current Photo
Archives
Contact Information
About us
Accredited Journalist
 
 

 

Chaw lam thil man tlahniam zel

Dated Aizawl, the 20th April 2010

Ministry of Consumer Affairs, Food & Public Distribution

Chaw lam thil man tlahniam zel

Hapta eng emaw ti atang khan chaw lam thil man a tlahniam a. Thla thum kalta atang khan atta, gram, dal, tur, urad dal, moong dal, masoor dal, alu leh purun sen man a tlahniam a, buhfai, wheat leh chi man erawh a la ngai thung. Thla kalta atang khan wheat, chini, antam hriak leh thingpuife man a tlawm tial tial bawk.

Sorkar laipui chuan thil man dinhmun hi uluk taka thlithlaiin thil man a hniam zel theihna turin a tul angin hma a la a, mi rethei leh mi vantlangin chaw lam thil hnianghnara an neih theihna tur kawng a dap reng bawk.

Sorkar hma lakna lian tak chu chaw hnianghnara a awm theihna tur te, lak luh a pun theihna tura policy siam te leh thawnchhuah a pun lohna tura hma lakte a ni. Thenkhatah chuan ram dang atanga thil chaw lut thin Public Sector Unit-te subsidy pek an ni a, heng thil PDS kaltlanga theh darh kawngah pawh subsidy pek a ni bawk. Thil thenkhat thawnchhuah khapna a awm a, ram chhunga mi thenkhatin an tlakchham mai lohna turin humhalh tlat a awm bawk a. Sorkar hian Public Distribution System hi theihtawpin a thlawp a. Hetianga hma lak a nih avang hian kum 2002 atang khan Central Issue price hi a pangngaiin a la kal reng phah a ni.

Fur ruahtui tlak kawngah harsatna a awm zeuh zeuh naa buhfai chhek khawl dinhmun a tha thung a. Kum 2009-01 (October-September) Kharif thlai hralh hun lai khan buhfai tonnes maktaduai 22.78 dah that a ni. Central Pool-a chaw lam thil khawlkhawm dinhmun pawh a tha hle a. Wheat tonnes nuai 2906.23 leh buhfai tonnes nuai 256.58 lai Ni 1.2.2010 khan dah khawl a ni.

State sorkarten ni tin mamawh thil chi hrang hrang an khawl khawm theih chin tur bitukna dan chu Essential Commodities Act hnuaia siamthata thupek chhuah a ni a. Hei hian heng thil chheprelh hi a veng dawn a ni.

Agriculture and Food Minister, Shri Sharad Pawar chuan thil man to chungchanga Parliament-a sawihonaah hmalakna an bawhzui dan chi hrang hrang a sawi a. Sorkar chuan open market scheme hmangin an khawl khawm sa chu hnianghnara lei tur a awm theih nan leh thil man thunun nan a pe chhuak a, hei bakah hian PDS leh welfare scheme dang atan a pe bawk. October 09 atanga March 2010 chhung khan wheat tonnes nuai 20 leh buhfai tonnes nuai 10 chu retail consumer hnenah State sorkarten an pe darh a. State sorkarte hian open market price an thunun theihna turin an duh zat zat an la chhuak thei a ni. Hei bakah hian a hlawma laka a ngam huai huaiin an hralh leh theihna turin wheat tonnes nuai 20.8 chu pek chhuah a ni bawk. January leh February 2010 chhung khan AAY, BPL & APL ration cards nei chhungkaw tinin thla khata kg. 10 theuh an dawn theih turin wheat leh buhfai ruahman a ni bawk a. Heimi atan hian PDS-a dahsa baka tih belh a ni.

India ram hian ei tur a tlakchham loh nan chaw lam thil tam tawk a chhek khawl a. Sorkar policy pakhat chu PDS leh welfare scheme dangte mamawh phuhruk nan chaw lam thil hnianghnara chhek hi a ni a, hei hi thil man sang tur venna a ni bawk. A dan pangngaia chaw lam thil chhek tura bituk buhfai metric tonnes 11.8 leh wheat metric tonnes 8.2 turah chaw lam thil metric tonnes 24.2 chuang chhek khawl mek a ni. Sorkar chuan nikum khan ei tur lam thil chhek khawl tam ber tum record a siam a, kuminah pawh hian hei hi la chhunzawm zel beisei a ni.

Thlai lian tham tana Minimum Support Price (MSP) chu ram mipui zaa 62 zet tling loneitute sum lakluh a pun theih nan kum nga chhung atan a tipung a. Wheat man tlawm ber rate chu quintal khatah Cheng 640 atangin Cheng 1,100-in a tisang a, buhhum quintal khat chu Cgeng 560 atangin Cheng 1,000-ah a tipung bawk. Vidarbha-a la chingtute chuan an la chu quintal khatah Cheng 2500-3000 in an hralh thei a ni. A hralhna lamah loneitute dinhmun pawh nasa taka chawikan a ni a. MSP tihpun hi Sorkarin CMP-a a intiam kha a niin loneitute hamthatna turin a intiamna chu a tipuitling zel a ni. Loneitute hnena thil man dinhmun tha siamna atana MSP a tisang hian thlai thar chhuah a tihpun bakah chaw lam thil mamawh hnianghnara neihna a thlen dawn a ni.

MSDP hi kum tina tihpun a nih laiin kum 2002 atang khan Central Issue Prices I(CIP) chu AAY, BPL leh APL chhungkuate tan tihpun a ni ve lo. Hemi avang hian kum ruk kalta chhung khan food subsidy atana senso hi Cheng vaibelchhe 20,000 atangin Cheng vaibelchhe 60,000 a tling chho ta a ni.

Chini

Kum hnih chhung a zawna fu thar chhuah a tlem avangin chini man nasa takin a sang a. Sorkar chuan fu chingtute hnen atanga a leina man a tisang zui bawk a. Fu chingtute chuan an fu man atangin hlawh tha tawk an nei a, hei hian fu chin hun lo thlen leh hunah pawh fu chingtute a tiphur hle dawn a ni. Mamawh leh pek a inbuktawk theih nan leh a man thunun a nih theihna turin sorkar chuan heng ruahmannate hi a siam a.

* Fu leh chini var leh thianghlim lakluhna chhiah lak a ni lova, open market-a chini man tihhniamna tur leh tlakchham venna atana tih a ni.

* Chini atanga chhiah lak hi zaa 10 atangin zaa 20-ah tihpun a ni. Hei hi bazar-a man to zawka chini zuartute man bithliah avanga mi retheiten an tawrh lohna tura tih a ni.

* May, 2009 atanga September ni 30, 2010 chhunga chini-a future trading phalna chu hlih a ni a. Sorkar laipui chuan UP chini siamna hmuna lakluh fute chu state danga siam pawh a phalsak ta a ni.

* Sorkar laipui hian a hlawma hralhtute leh tam tak lei theite tan stock theih chin bithliah a siam sak a. State sorkarte chu retailer-te tana stock limit siam theihna thu a pe a, chu chu state tam takin an bawhzui mek a ni. Sorkar inrawlhna avangin chini man, Kg.-a Cheng 50 hawlh pha thuak thuak kha a tlahniam leh ta a, tunah hian kg.-ah Cheng 38 atanga 40 inkar a ni ta a ni.

Be lam chi

Be (pulses) hi India rama chaw rinpui ber pakhat a ni. Mahse, be lam thar chhuah a tlem avangin lakluh a ni fo. Sorkar chuan be lam la luttute chu la lut tam turin a hriattir a. Kum 2008-09 chhung khan be lam chi tonnes maktaduai 2.48 lak luh a ni a. Kumin hian October thla thlengin tonnes maktaduai 1.59 lak luh a ni a, nikum khan tonnes maktaduai 1.32 lak luh a ni. Be lam chi hnianghnarna lei tur a awm theih nan leh a man khuahkhirhna turin theihtawp chhuah reng a ni.

* June ni 22, 2006 atanga Ni 31,03,2010 thleng khan be lam chi (babuli chana tih loh) thawnchhuah khap a ni. Be lam chi lak luhna chhiah zaa 10 lak thin chu June ni 8, 2006 atang khan lak a ni ta lova, be lam chi lakluhna chhiah chawi tawh lohna tur thupek hi pawhsei zel a ni a, Ni 31.3.2010 thlenga pawhsei a ni.

* Tur leh urad be lam chite hmanga ramdang nena insumdawntawn khap a ni a. India ram chhunga zalen taka hralh leh lei phal chu chana dal a ni a, a man pawh a pangngaiin a la awm reng a ni.

* Ram chhunga be lam chi thar chhuah a pun zel theihna turin PSU/Cooperative pawl - STC, PEC, MMTC, NCCF leh NAFED te chu be lam chi lakluh phalsak an ni a, he an thil lakluh kawnga hloh an nei emaw senso an nei emaw a nih chuan eng emaw zat pek kir leh remtih an ni. He scheme hnuaiah hian kum 2009-10 chhung khan be lam chi tonnes nuai 5.44 lak luh a ni a, Ni 23.3.2010 thlenga sem chhuah chu tonnes nuai 5.27 a ni.

* PDS kaltlanga be lam chi sem darhna scheme hnuaiah be lam chi lakluh reng reng kg. khatah Cheng 10-a subsidy pek a ni. PEC, STC, MMTC leh NCCF te chuan state pakua - West Bengal, Tamil Nadu, Kerala,
Andhra Pradesh, Maharashtra, Uttar Pradesh, Haryana, Rajasthan
leh Himachal Pradesh te hnenah PDS-a sem chhuah turin tonnes nuai 1.62 an supply a. Ni 6.2.2010-a Conference of State Chief Ministers neihah khan state tam takte chuan he scheme hi kum khat dang pawhsei leh an ngiat hlawm a. Nakum thlenga pawhsei tura tih a ni ta a ni.

* Yellow peas hi protein ngah tak chi a ni a. A tam bakah tuna a man tak phei chu dailuah chi dangte aiin a tlawm daih zawk. Yellow pea dailuah chi hi November ni 8, 2009 a\tang khan Kendriya Bhandar, Mother Dairy, NAFED leh NCCF-a hralh chhuahnaah kg.-ah Cheng 26-a hralh a ni.

Chaw lam thil chheprelh leh a man tova hralh venna turin Centre chuan State-te chu dan khauh tak lek turin a hriattir vek a. Tunah hian State/UT 23-te chuan be lam chi, buhfai, buhhum, hriak ei chi, oilseed leh chini chhek khawl theih chin leh phal chin bakah an chhek khawl zat puan chhuah ngei ngeina tur thupek an kengkawh mek a. State sorkarte chu Essential Commodities Act hnuaia hma la tura hriattir an nih angin mi nuai 1.5 chuang an dapnaah mi 7,700 an man tawh a ni.

Ram pum huap thilah chuan Sorkar laipui leh state sorkarten tang tlangin hma an la thin a. Agriculture and Food Ministry-te pawh State-te nen thlai thar dinhmun inhriattir leh food sector enkawlna kawngah an thawk ho reng thin. Thil man to thut chungchangah Prime Minister chuan State Chief Minister-te meeting a kova. Meeting-a thutlukna an siam angin hma an la dawn a ni. Core Group of Chief Minister leh Union Ministers te intel khawm chu agriculture lam thil te, ei tur hnianghnar leh hnianghnar loh leh a man thua engkim thlithlai tura din a ni.

Prime Minister-in a sawi angin hun khirh a tawp mek a, thil man pawh a ziaawm chho zel. Rabi thlai chin hun a tawp titih tawh a, data thar berah chuan nikum aiin kuminah hian wheat leh la lam chi an ching tam zawk. Heng thlaite hi March thla tawp lama bazara zawrh a nih hunah chuan chaw lam thil mante pawh a ziaawm tawh ngei ang.
 

PIB, Aizawl

This site is designed and hosted by National Informatics Centre, Mizoram State Unit
Information is provided and updated by : Press Information Bureau