India Portal

Media in Mizoram
English
Mizo
Achieve
Current Photo
Archives
Contact Information
About us
Accredited Journalist
 
 

 

WIND ENERGY : A NATURE’S BONANZA FOR ETERNITY

Shri Dilip Nigam * Smt. Gargi Malik **


Leilung hian a chhunga chengte seilenna leh dam khawchhuahna turin hmanraw tam tak a nei a. Mihringte pawhin hei vang tak hian chakna thapui, energy siam thar zelna tur thil kan hmuh belh zel a, chung zingah chuan tha si, thianghlim si, tlo tak chatuan daih thei tur thli chakna hman tangkai dan kan hria hi thil lawmawm tak a ni. Thli hian man a nei lova, tunlai thiamna sang zel nena hman kawp thiam phei chuan kawlphetha leh chakna thahrui tangkai tichhuak thei a lo ni reng mai a.

Hmanlai atang tawhin thli hi kawng hrang hranga hman tangkai a lo ni tawh thin a. Kum za tam liam tawhah pawh khan thlir chakna hi lawng tikaltu atan te, Windmill hmanga buh her nan te leh tui pump chhuah nan te, thing zai nante tangkai takin an lo hmang daih tawh a ni. India ramah pawh hian lova tuilakna atan te leh thil her nan hman thin a ni a, a hnu deuhah phei chuan thli chakna hi tangkai lehzuala hman a lo ni ta a,Tunah phei chuan Electricity siam nan leh a sen darh nan te hman tangkai a ni zui ta zel a ni.

Tunah hian India ram chu China, USA, Germany leh Spain ram te hnungzuiin khawvela thli chakna hmangtu ram 5 zingah a tel ve ta a, thla hlui January thla thleng khan kawlphetha 16000 MW lai a tichhuak der tawh a ni. India ramah tangkai zawkin thli hman theih a ni tih hi Centre for Wind Energy (C-WET) Chennai chuan a hre chiang hle a, GW 45 pe chhuak thei khawl pawh tunhnai khan GW 49.13 pe chhuak theiin a lo tilian tawh a ni. 12th Five Year Plan chhung hian sorkarin thli chakna hmangin power Mw 15000 neih belh a tum bawk.

Tun dinhmunah hian thli chakna chu kawng 3-ah tangkai taka hman mek a ni a. (1) Pakhatna chu Wind Pumps a ni a, hetah hian thli chakna hmanga kawlphetha lo chhuak chu tui pump-nan hmangin in tur leh lo lama tui lak nan tangkai taka hman mek a ni. (2) Wind Energy Generators (WEGS’s) - hei hi turbine-ah zawmin kawlphetha siam nan hman a ni a, thingtlang leh khawpuiah pawh tangkai takin Electric sem darh nan hman mek a ni. (3) Wind Electric Battery chargers - heihi electric siam nan hman a nih rualin a siamsa chu Battery ah a dah khawl nghal thin a ni.

Tangkai zawka thli chakna hman a nih theih nan Ministry of New and Renewable Energy chuan Programme pahnih a siam a, chungte chu - (1) Wind Energy Programme (2) Small Wind Energy & Hybrid System Programme te an ni.

Wind Energy Programme :
He programme hian thli chakna sem darh theih chi leh man tlawm zawka hralh chhuah theih siam chu a tum ber a ni a, thli chakna chungchang survey te leh a thatzia chhuichhuah te a huam a, awlsam zawka kalpui dan tur leh sorkar tan a hlawk zawk theihna tura Policy siamtirte pawh a huam vek a ni.

Wind Resource Assessment hi thli chak thatna hmun zawnna a ni a, thli chakna hi hmun bik neih deuh a nih avangin Project tan a nih hmain data lakkhawm lawk vek a ngai thin. State leh Union Terrotory 13 ah Wind Monitoring Station din a ni tawh a. Wind Energy Resource Survey in India tih handbook, wind date kimchang tak awmna pawh tih chhuah a ni tawh bawk. Numerical Wind Atlas pawh India ram tana siam tih chhuah a ni tawh bawk a, heihi a hlawkpuitu tur ten hmunhma tha zawk an lo neih theihna tur leh Wind Power Project tha leh sang zawk an neih theihna tur a ni.

Private Sector te an tel ve duhna tur khawpa a thatzia leh hralh tlak a nihzia tarlanna turin Demonstration Wind Power Project te siam a ni a. Demonstration Project hmasa ber chu Tamil Nadu State chhung Tuticorin bul lawkah kum 1986 khan bun a ni tawh a. Chumi hnuah pawh ram chhung hmun hrang hrangah demonstration project hi siam belh zel a ni.


Sawrkar chuan Wind Power Programme tihmasawn turin sum fai leh hmasawnna kawng dangin tanpuina a pe thin a. Hei hian depreciation 80% te, Custom duty-a concession siam leh chhiah thenkhat leh excise duty awl te pawh a huam a ni. Ministry of New and Renewable Energy chuan Generation Based Incentive(GBI) chu Wind Power Project tihlawhtling turin chak takin a kalpui mek a. He scheme hnuaiah hian Wind power hmanga State hrang hrangin kawlphetha semchhuahna man an senso tur chu ngaihhnathiamna siamin unit khatah pawisa 50 zela tihhniam a ni. GBI Scheme chu depreciation dil tel lova Project siam turte tana ruahman a ni a, Renewable Energy Development Agency (IREDA) leh financial institution dang ten windmill siam nan loan a pe thei a, Wind power project hmanga power MW khat zel pek chhuah nan cheng vaibelchhe 5.5 zel hman theih tura ruahman a ni bawk.

Thla hlui, January 2012 thleng khan avaiin mw 16000 pe chhuak thei tur bun a ni tawh a, heng hi Tamil Nadu, Gujarat, Maharastra, Andhra Pradesh, Karnataka leh Rajasthan ah te bun a ni. Ram chhung hmun hrang hrangah Wind electric Generators, Unit size 225Kw leh mw 2.5 inkar te dah a ni bawk.

Small Wind Energy & Hybrid System Programme
He programme hian helam thiamna tihpun leh tui pump chhuah nana Winmill hman uar zawk te, thingtlang leh khawpuiah pawh thli tamna hmuna eng siam nan leh, tui pump nana tangkai tak aero-generators/wind solar hybrid system te hman uar lehzual te chu a tum ber a ni a. Heng system te hi an thawh that lehzual theihna tur leh a hmelhmang a mawi zawkna tur teinzirchianna te pawh he programme vek hian a huam tel vek a. He programme tangkaipui zualtute chu - mimal, loneitute, NGO te, Central/State Govt. Agencies te, Local bodies te leh Panchayats te, Autonomous institution te, Research Organisation te , Cooperative Society te, Corporate Body te, Sumdawnna tenau leh Bank an ni.

He scheme hnuaiah hian aero-generator te, wind solar hybrid system leh water pumping wind mills hmangtute hnenah tanpuina tangka fai pek a ni a. Micro generation technologies te hi India hian tangkai takin a hmang hmek a, kawlphetha mamawh phuhruk nan leh sem darh nan a hmang thei bawk. Aero-generator hi wind electric generator te tak te a ni a, 50 kw thleng a pe chhuak thei a, electric awm lohna hmun, thli chakna lai atan a hman tawk hle a. Thli thawt chak zawng darkar khata km 30 vel a nihna hmunah kawlphetha tha tawk tak a siam chhuah theih a ni.Wind Solar Hybrid System hi aero-generators pahnih khat bakah SPV Panel, AC Power pe chhuak thei tura Battery Bank-a thlunzawm a ni a. Thli leh ni chakna atanga kawlphetha lakte chu battery bank ah duh hun huna hman theih turin a lo khawl thin a ni. Water pumping wind mills te hian tuichhunchhuah atang te, dil atang tein tui a pump chhuak thei a, darkar khat thli km 8 - 10 a thawtnaah hna a thawk thei a ni. Hengte hian darkar khatah tui litre 1000 atanga 8000 thleng an pump chhuak thei.

Ram than zelnaah power mamawh ang a lo awm zel theihna turin hun lo kal zelah pawh thli chakna hi a pawimawh telh telh dawn a ni.
 

PIB, Aizawl

This site is designed and hosted by National Informatics Centre, Mizoram State Unit
Information is provided and updated by : Press Information Bureau